జంతికలు | మినపప్పు జంతికలు | మురుకులు | మురుకులు రెసిపి | జంతికలు రెసిపి

మినపప్పు జంతికలు మెత్తగా ఉడికించిన మినపప్పుకి మూడింతలు బియ్యం పిండి వాము జీలకర్ర ఇంగువ నువ్వులు వేసి మెత్తగా తడిపి జంతికల మాదిరి వత్తి ఎర్రగా వేపుకునే ఈ జంతికల రుచి అమోఘం. ఇవి కమ్మగా ఎంతో రుచిగా ఉంటాయి.

పండుగంటే సాధారణంగా నడరు జంతికలు కారప్పూస చేస్తుంటారు, ఇంటికో తీరులో చిన్న చిన్న మార్పులు చేర్పులు చేసుకుంటూ చేసుంటుంటారు, కానీ ఈ మినపప్పు జంతికలు కరకరలాడుతూ యమా రుచిగా ఉంటాయండి.

ఈ జంతికలు తెల్లగా ఉంటాయి ఇంకా వాము ఘాటుతో ఉంటాయి, కారం ఉండదు.

రెసిపీ ప్రింట్ చేయడానికి

టిప్స్

మినపప్పు:

*నానబెట్టిన మినపప్పుని మెత్తగా ఉడికించి రుబ్బుకుని తీసుకుంటే జంతికలకి మరింత జిగురొచ్చి చాలా రుచిగా ఉంటాయి జంతికలు

బియ్యం పిండి:

*ఏ కొలతకి చేసినా కప్పు మినపప్పుకి మూడింతల బియ్యం పిండి ఉండాలి. నేను బజార్లో అమ్మే పేకెట్ బియ్యం పిండిని వాడాను.

జంతికలు గుల్లగా రావాలంటే:

*పిండిని కాస్త మృదువుగా తడుపుకోవాలి, అప్పుడే గుల్లగా వస్తాయి. పిండి గట్టిగా కలిపితే రాళ్ళలా ఉంటాయి జంతికలు అస్సలు రుచుండవు తినలేరు కూడా.

జంతికలు వేపే తీరు:

*ఈ జంతికలు వెడల్పుగా ఉండే మూకుడులో మాత్రమే వేపుకోవాలి, లోతుగా ఉండే మూకుడులో వేస్తే జంతికలు నూనెలో మునిగి పైకి తేలకుండా విరిగిపోతాయి. ఈ జంతికలు లేత గోధుమ రంగులో ఉంటాయి, ఎర్రగా వేగవు. ఆలా అని వేగిపోయాయ్ అని ముందుకు ముందే తీసేయకండి కాస్త గోధుమ రంగులోకి వచ్చేదాకా వేపి తీసుకొండి.

*దయచేసి మూకుడుకి మించి జంతికలు వేయకండి. ఆలా వేస్తే బాగా వేడి మీద వేగాల్సిన నూనె వేడి తగ్గిపోయి జంతికలు నూనె పీల్చి గుల్లగా రానే రావు. కాబట్టి నూనె మాంచి వేడి మీద ఉంచండి 5-6 జంతికలు వేసి వేపుకుని తీసుకోండి.

ఇంకో తీరు:

*ఈ జంతికలు వాము ఘాటుతో కమ్మగా ఉంటాయి. మీకు కారం కావాలనుకుంటే పచ్చిమిర్చి పేస్ట్ వేసుకోండి లేదా ఎండు కారమైన వేసుకోవచ్చు కాకపోతే ఇలా తెల్లగా ఉండవు.

More Recipes