వెజ్ ఖీమా మసాలా
ఈ పంజాబీ రెసిపి రెస్టారెంట్లల తో పాటు పంజాబీ దాభాల్లో రొటీలతో ఇష్టంగా తింటుంటారు. ఇది కూడా ఒకలాంటి మిక్స్ వెజ్ కర్రీనే కానీ రుచి రూపం భిన్నంగా ఉంటుంది.
కూరగాయలని సన్నగా ఖీమాలా తరిగి చేస్తారు అందుకే దీనికి ఆ పేరు. రొటీలు పూరీ చపాతీతో అందరికి నచ్చుతుంది, ఇష్టంగా తింటారు. ఆ కూర నేను తినను ఇది నేను తింటాను అనే పిల్లలకి ఇలా చేసి పెడితే వంకలు వెతక కుండా ఇష్టంగా తింటారు. ఇది నార్త్ ఇండియన్ స్టీల్లో కాక మనకి నచ్చేలా ఘాటుగా చాలా బాగుంటుంది.
టిప్స్
• ఈ కూరకి ప్రతీ కూరని ఎంత సన్నగా ఖీమాలా తరిగితే అంతా రుచి
• సహజంగా రెస్టారెంట్ కర్రీ అనగానే జీడీఅప్పు పేస్ట్ వేస్తారు, చిక్కని కమ్మని గ్రేవీ కోసం. వదిలేవచ్చు. కానీ, కూర కాస్త పల్చగా వస్తుంది
• జీడిపప్పు కి బదులు నానబెట్టిన కర్భూజ గింజలు , బాదం , వేపిన వేరుశెనగపప్పు , నానబెట్టిన గసగసాలు ఏవైనా వాడుకోవచ్చు. లేదా సగం సగం చేసి కూడా వాడుకోవచ్చు.
• ఈ రెసిపికి నేను ఫ్రొజేన్ బటానీ వాడాను కాబట్టి ఆఖరున వేశాను. మీరు తాజా బటానీ వాడేట్లు అయితే ముపై నిమిషాలు వేడి నీళ్ళలో నానబెట్టుకుని కాప్సికం వేసేప్పుడే వేస్తే చక్కగా ఉడుకుతాయ్.
• కాశ్మీరీ కారం వేస్తే కూరకి మాంచి రంగు లేని వారు మన కారమే కాస్త తగ్గించి వేసుకోండి
• బటర్ కి బదులు నెయ్యి కూడా వాడుకోవచ్చు.
• రెస్టారెంట్ రుచి రూపం కావాలంటే ఆఖరున ఫ్రెష్ క్రీమ్ వాడాల్సిందే , ఫ్రెష్ క్రీమ్ లేని వారు పాల మీగడ వాడుకోవచ్చు
• నచ్చితే ఇందులో కొద్దిగా పనీర్ తురుము కూడా వాడుకోవచ్చు
వెజ్ ఖీమా మసాలా - రెసిపీ వీడియో
Veg Kheema Masala | How to make Veg Kheema Masala Recipe
- Prep Time 5 mins
- Cook Time 20 mins
- Total Time 25 mins
- Servings 4
కావాల్సిన పదార్ధాలు
- 1/2 cup కాప్సికం తరుగు
- 1/4 cup ఫ్రోజెన్ బాటనీ
- 1/2 cup కేరట్ తరుగు
- 1/2 cup ఫ్రెంచ్ బీన్స్ తరుగు
- 1/2 cup ఉల్లిపాయ సన్నని తరుగు
- 3 టమాటో పేస్టు
- 2 పచ్చిమిర్చి తరుగు
- 2 tbsps కొత్తిమీర
- 2 tsps కారం
- 1 tsp ధనియాల పొడి
- 1 tsp వేయించిన జీలకర్ర పొడి
- 1 tsp గరం మసాలా
- 1/2 tsp కాశ్మీరీ కారం
- ఉప్పు
- 1 tsp జీలకర్ర
- 1 tbsp అల్లం వెల్లులి పేస్టు
- 2 tsps వెల్లులి తరుగు
- 2 tsps జీడిపప్పు పేస్టు
- 1 tsp కసూరి మేథి
- 1 tsp ఫ్రెష్ క్రీం
- 2 tbsps నూనె
- 1 tbsp బటర్
- 2 tsps నెయ్యి
- 250 ml నీళ్ళు
విధానం
- నూనె, బటర్ వేడి చేసి అందులో జీలకర్ర, వెల్లులి తరుగు, పచ్చిమిర్చి తరుగు వేసి బాగా వేయించుకోండి.
- ఇప్పుడు ఉల్లిపాయ సన్నని తరుగు వేసి ఉల్లిపాయలు గోల్డెన్ కలర్ లోకి వచ్చేదాకా వేయించుకోండి.
-
తరువాత ఉప్పు కారం, జీలకర్ర పొడి, ధనియాల పొడి, గరం మసాలా, కష్మీరి కారం వేసి బాగా వేయించి, కాప్సికం ముక్కలు వేసి 2 నిమిషాలు ఫ్రై చేసుకోండి.
- టమాటో పేస్టు వేసి టొమాటోలు పచ్చి వాసన పోయే దాకా ఫ్రై చేసుకోండి.
- ఆ తరువాత కేరట్ తరుగు, ఫ్రెంచ్ బీన్స్ సన్నని తరుగు వేసి ముక్కలు మగ్గే దాకా ఫ్రై చేసుకోండి.
-
ఇప్పుడు ఫ్రోజెన్ బాటనీ వేసి మరో 3 నిమిషాలు ఫ్రై చేసుకుని నీళ్ళు పోసి, జీడిపప్పు పేస్టు వేసి బాగా కలుపుకుని కూరని మీడియం మంట మీద దగ్గర పడనివ్వండి.
- దింపే ముందు కొత్తిమీర తరుగు, ఫ్రెష్ క్రీం, నెయ్యి కసూరి మేథీ వేసి బాగా కలిపి మరో 3 నిమిషాలు కుక్ చేసుకోండి.
Leave a comment ×