బెండకాయ మజ్జిగ పులుసు
మజ్జిగ పులుసులు ఎన్నో రకాలున్నాయ్, నేనూ చాలానే చేశాను.
ఉల్లిపాయ పచ్చిమిర్చి తిరగమూత వేసి చేసే మజ్జిగ చారు తెలుగు రాష్ట్రాల్లో ఎక్కువగా చేస్తారు. ఎప్పుడూ ఒకే తీరుగా కాక ఈ సారి బెండకాయ మజ్జిగ పులుసు చేయండి, ఆ పూట తృప్తిగా భోజనం చేస్తారు.
బెండకాయ అంటే ఇష్టమున్నా, దానిలోని జిగురు కారణంగా ఎక్కువగా ఇష్టపడరు. ఈ రెసిపీ లోని టిప్స్ తో చేస్తే బెండకాయ జిగురులేకుండా ఎంతో రుచిగా ఉంటుంది.
ఈ స్టైల్ బెండకాయ మజ్జిగ పులుసు నేను తమిళనాడులో ఓ పెళ్ళిలో తిన్నాను, ఆ రెసిపిని నా స్టైల్ లో కొంచెం మనకి నచ్చే తీరులో మార్పు చేశా.
మజ్జిగ చారు చేసే ముందు ఓ సారి కింద టిప్స్ ఫాలో అయి చేయండి:
టిప్స్
-
బెండకాయలు కడిగి తుడిచి తడిలేని కత్తితో అంగుళం ముక్కలు కోసుకుంటే జిగురు తగ్గుతుంది
-
బెండకాయ ముక్కలు వేడి నూనె లో కాస్త ఉప్పు వేసి ఎక్కువగా కలపకుండా నూనె పట్టించి మూత పెట్టి హై-ఫ్లేం మీద వేపితే చక్కగా జిగురు వదులుతుంది.
-
పెరుగులో కొబ్బరి పేస్టు కొద్దిగా కలుపుకోవాలి, లేదంటే పెరుగు మజ్జిగలో పోసాక విరిగిపోతుంది
-
ఈ బెండకాయ మజ్జిగ చారుకి పుల్లని పెరుగు రుచిగా ఉంటుంది. పుల్లని పెరుగు లేని వారు ఆఖరున అర చెక్క నిమ్మరసం పిండుకోండి
-
మజ్జిగ చారులు కొబ్బరి నూనెతో తాలింపు ప్రేత్యేకమైన రుచినిస్తుంది. ఓ సారి కొబ్బరి నూనె తాలింపు వేసి చుడండి, తప్పక నచ్చుతుంది. నచ్చని వారు వేరుసెనగ నూనె లేదా రిఫైండ్ నూనె తో వేసుకోండి.
బెండకాయ మజ్జిగ పులుసు - రెసిపీ వీడియో
Okra Buttermilk Stew / Kadhi with Ladies Fingers | Tamilnadu Style Bhindi Kadhi
- Prep Time 5 mins
- Cook Time 20 mins
- Total Time 25 mins
- Servings 4
కావాల్సిన పదార్ధాలు
- 200 gms బెండకాయ ముక్కలు
- 1/2 ltr చిలికిన పెరుగు
-
కొబ్బరి పేస్టు కోసం
- 2 tbsps పచ్చి సెనగపప్పు(గంట నానబెట్టినది)
- 2 tsps బియ్యం(గంట నానబెట్టినది)
- 1 tbsp ధనియాలు
- 1/4 cup పచ్చి కొబ్బరి ముక్కలు
- 1 tsp జీలకర్ర
- 2 పచ్చిమిర్చి ముక్కలు
-
మజ్జిగ పులుసు కోసం
- 1/4 cup కొబ్బరి/రిఫైండ్ నూనె
- 1 tsp ఆవాలు
- 2 ఎండు మిర్చి
- 1 tbsp అల్లం తరుగు
- 1/2 tsp పసుపు
- 2 రెబ్బల కరివేపాకు
- 2 చిటికెళ్ళు ఇంగువా
- రుచి సరిపడా రాళ్ళ ఉప్పు
- 2 tbsps కొత్తిమీర తరుగు
విధానం
- మిక్సీ లో పేస్టు కోసం ఉంచిన పదార్ధాలన్నీ వేసి నీళ్ళతో పలుకులేని మెత్తని పేస్టు చేసుకోవాలి.
- మూకుడులో నూనె వేడి చేసి బెండకాయ ముక్కలు కొద్దిగా ఉప్పు వేసి కలిపి మూత పెట్టి హై-ఫ్లేం మీద ఎర్రగా వేపుకోవాలి. మధ్య మధ్యలో కలుపుకోవాలి. బెండకాయలు వేగాక తీసి పక్కనుంచుకోండి.
-
అదే మూకుడులో ఇంకాస్త నూనె వేడి చేసి అందులో ఆవాలు, పచ్చిమిర్చి, ఎండుమిర్చి, జీలకర్ర వేసి ఎర్రగా వేపుకోవాలి.
- అందులోనే అల్లం, పసుపు వేసి కరివేపాకు వేసి వేపుకుని ఇంగువ కూడా వేసి వేపుకోవాలి.
- అల్లం వేగాక మెత్తగా రుబ్బుకున్న సెనగపప్పు కొబ్బరి పేస్టు వేసి కొంత పక్కనుంచుకోవాలి.
-
సెనగపప్పు ముద్ద వేపి కాసిని నీళ్ళు పోసి ఉడుకుపట్టేదాక మీడియం ఫ్లేం మీద ఉడకనివ్వాలి.
- చిలికిన పెరుగులో సెనగపప్పుముద్ద వేసి బాగా కలిపి మూకుడులో పోసి ½ లీటర్ నీళ్ళు ఉప్పు వేసి గడ్డలు లేకుండా కలుపుకుని సన్నని సెగ మీద ఓ ఉడుకు రానివ్వాలి.
- మజ్జిగ ఉడుకుపట్టాక వేపుకున్న బెండకాయ ముక్కలు, కొత్తిమీర తరుగు వేసి మూతపెట్టి 3-4 నిమిషాలు ఉడకనిచ్చి దిమ్పెసుకోవాలి.
Leave a comment ×
1 comments