తెలంగాణ స్టైల్ చేపల పులుసు | చేపల పులుసు

5.0 AVERAGE

తెల్సి తెలియని స్మోకీ ఫ్లేవర్తో మసాలా ఘాటుతో కారంగా పుల్లగా చిక్కని గ్రేవీతో ఎంతో రుచిగా ఉంటుంది తెలంగాణ స్టైల్ చేపల పులుసు.

ఆంధ్రులు చేసే చేపల పులుసు తెలంగాణా వారు చేసే చేపల పులుసు కాస్త భిన్నం. తెలంగాణా చేపల పులుసు అంటే టొమాటోలు వేయరు, ఇంకా ఎండు కొబ్బరి, గసగసాలు, చక్కా లవంగాలు, కాల్చిన ఉల్లి వేసి పులుసు చిక్కగా కాస్తారు.

తెలంగాణా తీరు చేపల పులుసు కాస్త కారం, ఘాటు పాళ్ళు ఎక్కువే!!! అన్నంతోనే కాదు ఇడ్లీ అట్టు వడ దేనితోనైనా చాలా రుచిగా ఉంటుంది పులుసు.

మీరు ఈ రెసిపీని కూడా ఇష్టపడవచ్చు చేపల పులుసు

చేపల పులుసు చేసే ముందు కింద టిప్స్ చూసి చేసుకోండి, అప్పుడు ఏ చేప వాడాలి పులుసు ఎలా కాస్తే రుచి వస్తుంది, ఎందుకు చేపల పులుసు మరుసటి రోజు తినాలి, పులుసు ఎక్కువ రోజులు నిల్వ ఉండాలంటే ఏమి చెయ్యాలి లాంటి టిప్స్ అన్నీ అర్ధమవుతాయి.

రెసిపీ ప్రింట్ చేయడానికి

టిప్స్

చేపలు:

నేను బొచ్చ చేప కిలో ముక్కలు వాడాను. మీరు ఇదే తీరు లో ఏ చేపతో అయినా పులుసు కాచుకోవచ్చు
చేపల పులుసులో కచ్చితంగా చేప తలా ముక్క ఉంచండి. అప్పుడే పులుసుకి రుచి. చాల మంది చేపల్లో తల ముక్క వద్దని వదిలేస్తారు. మీరు తినకపోయినా పులుసులో తలా ముక్కలు వేసి మరిగిస్తే పులుసు చాలా రుచిగా ఉంటుంది.

పులుసు:

చింతపండు వేడి నీళ్లలో నానబెడితే సులభంగా గుజ్జు వచ్చేస్తుంది.
ఈ చేపల పులుసుకి చింత గుజ్జు తీసుకోండి, పల్చని పులుసు పోయకండి. ముందు చిక్కని పులుసు మరిగి నూనె పైకి తేలాలి, అలా నిదానంగా మరిగితేనే పులుసుకి రుచి, ఇంకా నిల్వ ఉంటుంది.

ఉల్లిపాయ:

కిలో చేప ముక్కలకి నాలుగు మీడియం సైజు ఉల్లిపాయలు సరిపోతాయి.
ఉల్లిపాయలు పొయ్యి మీద పెట్టి నిదానంగా తిప్పుకుంటూ సన్నని సెగ మీద కాలిస్తే ఉల్లిపాయ లోపలి దాకా మగ్గుతుంది, పైన తోలు కాలిపోతుంది. అప్పుడు ఉల్లికి స్మోకీ ఫ్లేవర్ వస్తుంది.

బెస్ట్ చేపల పులుసుకి కొన్ని టిప్స్:

చేపల పులుసు కచ్చితంగా సన్నని సెగ మీద నూనె పైకి తేలేదాక ఉడకాలి, అప్పుడే పులుసులో ఉడికిన ముక్క బిరుసెక్కి ముక్క త్వరగా విరగదు, ఇంకా పులుసు మూడు రోజులైనా పాడవదు.
చేపల పులుసు చాలా మంది చేప ముక్కని ముక్కని ఫోర్క్తోగుచ్చి చూసి ముక్క ఉడికితే దింపేస్తారు. నిజమే ఆ తీరులో కూడా చేప ఉడికినట్లే కానీ పులుసు నిల్వ ఉండదు. రెండవ రోజుకి పాడైపోతుంది.
మీ అందరికి తెలిసినదే చేపల పులుసు చేసిన రోజు కంటే తరువాతేహి రోజు ఇంకా రుచిగా ఉంటుంది, ముక్కలకి పులుసు బాగా పట్టి.

ఆఖరుగా ఇంకొన్ని టిప్స్ :

నా దగ్గర వేపిన అల్లం వెల్లులి పేస్ట్ ఉంది అందుకే నేను చేప ముక్కలకి ముందే పట్టించాను నూనెలో వేపకుండా. మీరు మాత్రం నూనె వేసి వేపుకోండి.
చేపల పులుసు నేను కాస్త చిక్కగానే పెట్టాను, ఈ చిక్కదనం వేడి మీద అప్పటికప్పుడు తినడానికి చాలా రుచిగా ఉంటుంది. కానీ చల్లారే పాటికి మరింత చిక్కగా అయిపోతుంది పులుసు. అప్పుడు అన్నంతో బాగానే ఉన్నా, ఇడ్లీ అట్టు వడ ఇలా దేనితోనైనా నంజుకు తినడానికి రుచిగా ఉండదు. అందుకే పులుసు కాస్త పలుచగా పెట్టుకోండి అట్టు ఇడ్లీతో తిందామనుకుంటే!!!

More Recipes