బాదం షేక్

Street Food

5.0 AVERAGE

చిక్కని కమ్మని చల్లని బాదం షేక్ వేసవిలో భారతీయుల ఫెవరెట్ డ్రింక్స్లో ఒకటి. కుంకుమపువ్వు సువాసనతో నానబెట్టిన బాదం పలుకులు తగులుతూ గ్లాసులు తాగేలా చేస్తుంది.

బాదాం పాలకి బాదం షేక్కి చిన్న వ్యత్యాసం ఉంది. బాదాం పాలు కాస్త పలుచగా ఉంటాయి, ఇంకా పాలు పంచదార కుంకుమపువ్వు లేదా యాలకులపొడి వేసి చేస్తారు. బాదాం షేక్ బాదం పేస్ట్తో పాటు చిక్కదనం కోసం కస్టర్డ్ పౌడర్ వాడి చేస్తారు.

బాదాం షేక్ పాపులర్ స్ట్రీట్ ఫుడ్ రెసిపీ. నిజానికి బాదాం షేక్లో కూడా బాదాం పేస్ట్తో పాటు కాస్టర్ పౌడర్ వేసి మరిగించి చేయాలి. కానీ స్ట్రీట్ ఫుడ్లో అచ్చంగా కస్టర్డ్ పౌడర్ వేసి చిక్కబరిచి బాదం పలుకులు వేస్తారు. నేను ఆరోగ్యంగా రుచిగా అదే స్ట్రీట్ ఫుడ్లో మనకి నచ్చే బాదాం షేక్ రెసిపీ చెప్తున్నా!

రెసిపీ ప్రింట్ చేయడానికి

టిప్స్

బాదాం:

నానబెట్టిన బాదాం తొక్క తీసి పాలతో మెత్తని పేస్ట్ చేసుకోవాలి. దీనికి రాత్రంతా నానబెట్టినవి లేదా వేడి నీటిలో 2 గంటలు నానబెట్టిన పప్పు అయినా వాడుకోవచ్చు.

కుంకుమ పువ్వు:

బాదాం షేక్కి మాంచి పరిమళం రంగునిస్తుంది కుంకుమపువ్వు. లేని వారు కాస్త యాలకులపొడి, చిటికెడు పసుపు రంగు కోసం వేసుకోండి.

ఇలా చల్లబరిస్తే మరింత రుచిగా ఉంటుంది:

బాదం షేక్ తయారయ్యాక డీప్-ఫ్రీజర్లో 2-3 గంటలు ఉంచితే సగం పైన గడ్డ కడుతుంది. అప్పుడు 30 సెకన్లు హై-స్పీడ్ మీద బ్లెండ్ చేస్తే పళ్ళు జివ్వు మనిపించే బాదాం షేక్ తయారవుతుంది, మరింత రుచిగా ఉంటుంది. ఇది మీకు మామూలు ఫ్రిజ్లో పెట్టి చల్లబరిస్తే రాదు.

నానబెట్టిన బాదాం పలుకులు/బద్దలు:

బాదాం షేక్ సర్వ్ చేసేప్పుడు గ్లాసు అడుగున కొన్ని బాదాం పలుకులు వేసి షేక్తో నింపి బాదాం పలుకులు దండిగా పైనా వేస్తే తాగుతున్నప్పుడు ఎంతో రుచిగా ఉంటుంది.

పంచదార:

పంచదార ఇష్టపడని వారు బెల్లాన్ని కరిగించి వడకట్టి మరిగిన పాలల్లో పోసి కలుపుకోవాలి. లేదా తేనె కూడా ఆఖరున కలుపుకోవచ్చు