తోటకూర మజ్జిగ చారు | ఆంధ్రుల స్పెషల్ తోటకూర మజ్జిగ చారు

5.0 AVERAGE

"తోటకూర మజ్జిగ చారు" చాలా త్వరగా అయిపోయే కమ్మని ఆంధ్రుల స్పెషల్ రెసిపీ. ఇది నాకు చాలా ఇష్టం. దేశమంతటా మజ్జిగ చారులు ఉన్నాయ్. ఉత్తరాది వారు ఖడి అని తెలుగు వారు మజ్జిగ చారు అంటారు, తమిళ వారు మొరు కొలంబు అంటారు.

తెలుగు వారు మాత్రం దాదాపుగా ప్రతీ కాయ- కూరతో పెరుగుతో పచ్చళ్ళు, చారులు చేస్తుంటారు. అలాంటి పెరుగు పచ్చళ్లల్లో ఇదీ ఒకటి.

ఎప్పుడూ చేసుకునే మజ్జిగ చారు/పులుసుకి బదులు వీటితో చేసుకుంటే రుచికి రుచి ఆరోగ్యానికి ఆరోగ్యం. ఇది మా ఇంట్లో చాలా ఎక్కువగా చేస్తుంటాము. ఇది చేసిన రోజున ఓ వేపుడు, ఓ రోటి పచ్చడి చేస్తే చాలు. పరిపూర్ణమైన భోజనం అనిపిస్తుంది.

ఆరోగ్యకరమైన పెరుగుపచ్చళ్ళు ఇంకొన్ని:

తోటకూరకి బదులు ముదిరిన తోటకూర కాడలు, బచ్చలికూర, కాబేజీ, మునక్కాడ, బూడిద గుమ్మడి, ముల్లంగి, ముల్లంగి ఆకు, కాలీఫ్లవర్ కాడలుతో కూడా మజ్జిగ పులుసు చేసుకోవచ్చు. ఒక్కోదానిది ఒక్కో రుచి, ఒక్కో ప్రయోజనం.

రెసిపీ ప్రింట్ చేయడానికి

టిప్స్

• ఈ మజ్జిగ పులుసులో నేను వెల్లూలి వాడాను. నచ్చని వారు వదిలేయోచ్చు.

• అల్లం ఎక్కువగా ఉంటె చాలా తోటకూర మజ్జిగ పులుసు రుచి బాగుంటుంది. కావాలంటే అదీ తగ్గించుకోవచ్చు. కారం వాడడం కంటే, పచ్చిమిర్చి కారం చాలా బాగుంటుంది.

• సహజంగా అందరూ నన్ను మెంతులు చేదుగా ఉంటాయ్ స్కిప్ చేయొచ్చా అని అడుగుతుంటారు. మెంతులు నూనెలో ఎప్పుడూ ముందు వేసి అది కాస్త వేగాక ఆవాలు వేసి, అవీ చిటపటమన్నాక మిగిలిన తాలింపు సామాను వేసుకుంటే పర్ఫెక్ట్ గా ఉంటుంది. మెంతులు వేగితే రుచి, సువాసన లేదంటే చేదుగా ఉండిపోతుంది.

• పెరుగులో వేడిగా ఉన్న తోటకూర వేస్తే పెరుగూ తరకలుగా ఉంటుంది. అందుకే చల్లార్చిన తరువాత తోటకూర వేసుకోండి.