ఆంధ్రా స్పెషల్ గోంగూర మటన్

4.9 AVERAGE

కారంగా ఘాటుగా పుల్లని గోంగూర మటన్ కలిపి ఉడికించి చేసే ఆంధ్రా స్టైల్ గోంగూర మటన్ చేసిన ప్రతీ ఇంటా పండుగలా అనిపిస్తుంది.

వేడిగా అన్నం, బగారా అన్నంతో ఎంతో రుచిగా ఉంటుంది గోంగూర మటన్.

గోంగూర మటన్ ఆంధ్రా తెలంగాణా రెండు ప్రాంతాల్లో ఎక్కువగా చేస్తారు, అందులోను ఆంధ్రులు ఎక్కువగా చేస్తారు. ఈ గోంగూర మటన్ చేయడం చాలా తేలిక, వేసేవి కూడా కొన్ని పదార్ధాలే. మాంసం మెత్తగా ఉడికి సరైన మోతాదులో ఉప్పు కారాలుంటే చాలు, పర్ఫెక్ట్ గోంగూర మటన్ తయారు.

గోంగూర మాంసం రెసిపీ తెలుగు వారందరూ దాదాపుగా ఒకే తీరులోనే చేస్తారు, ప్రాంతాన్ని బట్టి వేసే పదార్ధాల కొలతల్లో చిన్న మార్పులుంటాయి అంతే! నేను గుంటూరు స్టైల్ గోంగూర మటన్ చేస్తున్నాను, ఇది పూర్తిగా వెనుకటి తీరు.

రెస్టారెంట్స్ తీరు గోంగూర మాంసం అంటే కాస్త పలుచగా ఉంటుంది, పైగా రెస్టరెంట్స్లో మాంసాన్ని విడిగా ఉడికించి గోంగూరని విడిగా ఉడికించి ఆర్డర్ వచ్చిన వెంటనే ఉప్పు కారాలు కలిపి వేడి చేసి ఇస్తారు. ఆ తీరులో చేసే మాంసానికి గోంగూర పులుపు పట్టదు. మాంసం చప్పగా ఉంటుంది.

నేను చేసే గోంగూర మటన్ కాస్త టైం పడుతుంది కానీ కచ్చితమైన రుచిని మీరు ఆస్వాదించగలుగుతారు!

రెసిపీ ప్రింట్ చేయడానికి

టిప్స్

మాంసం :

లేత మాంసం ఎముకలతో ఉన్నది అయితే రుచి చాలా బాగుంటుంది. ముక్కలు మీడియం సైజు ఉండాలి. మరీ చిన్నవి అయితే కూర తయారయ్యేపాటికి ఇంకా చిన్నవిగా అయిపోతాయి.

నూనె:

గోంగూర మాంసానికి నూనె కాస్త ఎక్కువగానే పడుతుంది. నూనె ఉంటేనే జిగురుగా ఉండే గోంగూర నూనెలో మగ్గి రుచిగా ఉంటుంది కూర. అయినా మాంసం కూరలకి నూనె ఉంటేనే రుచి.

గోంగూర:

గోంగూర రెండు రకాలు ఎర్ర గోంగూర, తెల్ల గోంగూర. ఎర్ర గోంగూర తెల్ల గోంగూర కంటే కాస్త ఎక్కువ పుల్లగా ఉంటుంది, సాధారణంగా ఈ ఎర్ర గోంగూర పచ్చళ్ళకి వాడతారు.
మీరు తెల్ల గోంగూర వాడుతున్నట్లైతే కొద్దిగా చింతపండు వేసుకుంటే పులుపు సరిపోతుంది.
గోంగూర ఆకులు మాత్రమే వాడాలి. ఆకులు వోలిచాక కచ్చితంగా 2-3 సార్లు నీళ్లలో వేసి బాగా కడగాలి, లేదంటే గోంగూరలో ఉండే ఇసుక వదలదు.

కూర మాంచి రుచి కోసం:

మాంసం విడిగా నిదానంగా ఉడికితేనే ఎంతో రుచిగా ఉంటుంది. నిజమే సుమారుగా గంట సేపు మాంసం ఉడకడానికే పడుతుంది, కానీ ఈ రుచి కుక్కర్లో నీళ్లు పోసి వండితే రాదు.

కుక్కర్లో అయితే ఇలా చేయండి:

సమయం తక్కువగా ఉన్నవారు కుక్కర్లో 750ml నీరు పోసి మీడియం ఫ్లేమ్ మీదే ఉడికించి మిగిలిన పద్ధతిలో చేసుకోండి.