ఆంధ్రా స్టైల్ ఉల్లిపాయ పులుసు

4.5 AVERAGE

అచ్చంగా ఉల్లిపాయలని నూనెలో వేపి చింతపండు పులుసు బెల్లంలో ఉడికించే ఆంధ్రా స్టైల్ ఉల్లిపాయ పులుసు పుల్లగా కారంగా తియ్యగా తిన్నకొద్దీ తినాలనిపించేలా ఉంటుంది.

ఉల్లిపాయ పులుసు వేడి వేడి అన్నంతో చాలా రుచిగా ఉంటుంది. చింతపండు వేసి చేసే పులుసులంటే దక్షిణ భారతదేశం వారికి ఎంతో ఇష్టం. అందులో తెలుగు వారికి ఇంకాస్త ఎక్కువ ఇష్టం. తెలుగు వారి పులుసులలో కాస్త పులుపు పాళ్ళు ఎక్కువే!!!

ఉల్లిపాయల పులుసు రాష్ట్రానికి ఒక్కో తీరులో ఉంటుంది. నేను ఇదివరకు చెట్టినాడు స్టైల్ ఉల్లిపాయ పులుసు చేసాను చుడండి. చెట్టినాడు స్టైల్ ఉల్లిపాయ పులుసు కాస్త చిక్కగా కొబ్బరీ కమ్మదనం, సోంపు పరిమళంతో ఉంటుంది.

ఆంధ్రుల ఉల్లిపాయ పులుసు కాస్త పలుచగా ఎక్కువ తియ్యగా పుల్లగా ఉంటుంది. ఈ సింపుల్ ఉల్లిపాయ పులుసు రోజూ వారి భోజనానికి, లంచ్ బాక్సులకి పర్ఫెక్ట్.

రెసిపీ ప్రింట్ చేయడానికి

టిప్స్

ఉల్లిపాయలు:

సాంబార్ ఉల్లిపాయలు, మామూలు ఉల్లిపాయలు చీరి వాడితే పులుసు రుచి చాలా బాగుంటుంది. సాంబార్ ఉల్లిపాయలు లేనట్లయితే మీరు మామూలు ఉల్లిపాయలనే కాస్త మందంగా పొడవుగా చేరుకుని కూడా వాడుకోవచ్చు.

మరికొన్ని టిప్స్:

ఈ పులుసులో వేసే చింతపండుకి తగినట్లుగా కారం ఉప్పు బెల్లం ఉండాలి. అప్పుడే రుచి. బెల్లం నచ్చని వారు వదిలేయొచ్చు. కాబట్టి వేసే కారం మిరపకాయలు రుచి చూసి వేసుకోండి.

పులుసు సన్నని సెగ మీద ఎంత ఎక్కువసేపు మరిగితే అంత రుచి పులుసు చిక్కదనానికి బియ్యం పిండి వాడాను, నచ్చితే మీరు బియ్యంపిండికి బదులు సెనగపిండి కూడా గడ్డలు లేకుండా కలిపి వాడుకోవచ్చు.

తాలింపులో ఎర్రంగా వేపితేనే మెంతులు రుచినిస్తుంది పులుసుకి, లేదంటే చేదుగా తగులుతుంది పంటికి. అందుకే తాలింపు నెమ్మదిగా వేపుకోవాలి