బెండకాయ పులుసు

Curries

4.5 AVERAGE

పుల్లగా కారంగా చిక్కగా ఉండే ఆంధ్రా స్టైల్ బెండకాయ పులుసు ఒక్కటి చాలు ఆ పూట భోజనాన్ని తృప్తిగా ముగించడానికి. బెండకాయ ముక్కల్లో చిక్కని చింతపండు పులుసు పోసి చేసే ఈ పులుసు దాదాపుగా ప్రతీ తెలుగు వారింట్లో చేసుకునే సింపుల్ రెసిపీ.

భోజనంలో ఏదో ఒక కాయ కూరతో కాచే పులుసులు తిననిదే తెలుగు వారి భోజనానికి పరిపూర్ణత రాదు. అందుకే చింతపండు పులుసు పోసి చేసే పులుసులు తెలుగు వారితో పాటు దక్షిణాది రాష్ట్రాల వంటల్లో ప్రధానంగా కనిపిస్తాయి.

బెండకాయ పులుసు చిన్న మార్పులతో అంటే కాసింత మసాలాలు వేసి చేస్తారు, కొబ్బరి ముద్ద వేసి చేస్తారు, నేను చాలా సింపుల్ పద్ధతి చేస్తున్నాను. ఈ పద్ధతి చాలా సులభం అంతే రుచి కూడా.

చేసే ముందు టిప్స్ చదివి చేయండి బెస్ట్ బెండకాయ పులుసుని ఆస్వాదించండి.

రెసిపీ ప్రింట్ చేయడానికి

టిప్స్

బెండకాయలు:

బెండకాయలు లేతగా ఉంటె పులుసు రుచి బాగుంటుంది. ఇంకా బెండకాయ అంగుళం పైన సైజు ముక్కలుగా తరుక్కోండి
బెండకాయ ముక్కలు నూనెలో బాగా వేగితే జిగురు తగ్గుతుంది.

ఉప్పు కారాలు:

పులుసులకి ఉప్పు కారాలు ఉండాలి అప్పుడే రుచి. నేను ఈ పులుసులో ఎండు కారం వేయలేదు. నచ్చితే మీరు వేసుకోవచ్చు.

సెనగపిండి:

పులుసుని చిక్కబరచడానికి ఇంకా కమ్మదనాన్ని సెనగపిండి నీళ్లు పోసి మరిగించాను, మీరు కావాలంటే బియ్యంపిండి నీళ్లు కూడా పోసుకోవచ్చు.

బెల్లం:

ఈ పులుసుకి కాస్త బెల్లం ఉంటేనే రుచి. ఆ తీపి తగినట్లుగా ఉప్పు కారాలు ఉండాలి, అప్పుడే రుచి. అచ్చంగా నేను చెప్పిన కొలత బెల్లం వేసి ఉప్పు కారాలు తగ్గితే తియ్యగా ఉంటుంది పులుసు.