శెనగపప్పు ఆమ్లెట్ కర్రీ
కోడి గుడ్డుతో ఏ రెసిపీ చేసినా ఆ పూట తృప్తిగా అనిపిస్తుంది, నాలాగే మీలో చాలా మందికి అనిపిస్తుండవచ్చు. వేడి అన్నం తో ఈ శెనగపప్పు ఆమ్లెట్ కర్రీ కూడా ఎంతో రుచిగా ఉంటుంది.
ఈ సింపుల్ రెసిపీ హైదరాబాదీ ముస్లిమ్స్ ఎక్కువగా చేస్తుంటారు. వ సారి రంజాన్ మాసంలో అమీనా ఆంటీ ఇఫ్తార్లో పార్టీలో ఈ కూర సర్వ్ చేశారు, నాకు చాలా నచ్చేసింది. కొన్ని రెసిపీస్ అంతే చూడడానికి చేయడానికి చాలా సింపుల్, ఇంకా వేసేవి నాలుగైదు పదార్ధాలే అయినా ఎంతో ప్రేత్యేకంగా అనిపిస్తుంది.
ఈ రెసిపీ బ్యాచిలర్స్కి ఇంకా గుడ్డుతో ఏదైనా ప్రేత్యేకంగా చేయాలనుకుంటే పర్ఫెక్ట్!!!
టిప్స్
ఆమ్లెట్:
-
ఆమ్లెట్ కాలడానికి కాసింత నూనె ఎక్కువగా ఉంటే బాగా పొంగుతుంది, రుచిగా ఉంటుంది. లేదా ఎండిపోయినట్లుగా ఉంటుంది.
-
పాన్లో ఆమ్లెట్ వేశాక 90% కాలనిచ్చి మధ్యకి మడిచి తీసేస్తే చాలు, ఇంకా చెమ్మగా ఉండే గుడ్డు మిగిలిన వేడికి మగ్గిపోతుంది. గుడ్డు ఎక్కువగా కాలిస్తే తేమ ఆరిపోయి రుచిగా ఉండదు.
శెనగపప్పు:
- శెనగపప్పు కడిగి గంట నానబెట్టి ఉడికిస్తే పప్పు మెత్తగా ఉడుకుతుంది అప్పుడు రుచిగా ఉంటుంది కర్రీ. లేదంటే పలుకుగా తగులుతుంది.
ఇంకొన్ని విషయాలు:
-
కర్రీ ఆమ్లెట్ ముక్కలు వేసి 2-3 నిమిషాలు ఉడికించి దింపేస్తే చాలు. ఎక్కువగా ఉడికిస్తే వేడి మీద పర్లేదు కానీ చల్లారుతున్న కొద్దీ గట్టిగా పప్పులా అయిపోతుంది. గుడ్డు శెనగపప్పు కూరలోని తేమని పీలచేస్తుంది.
-
ఏ కారణం చేతనైనా కూర దగ్గర పడితే మరిగే నీళ్ళు కలిపి పలుచన చేసి కాసింత ఉప్పు వేసుకుంటే సరిపోతుంది.
-
నచ్చితే 2 tbsp చింతపండు పులసు కూడా వేసుకోవచ్చు.
శెనగపప్పు ఆమ్లెట్ కర్రీ - రెసిపీ వీడియో
Bengal Gram Omelette Curry | Omelette Chanadal Curry | Omelette Curry | How to Make Bengal Omelette Curry
- Prep Time 5 mins
- Cook Time 20 mins
- Total Time 25 mins
- Servings 6
కావాల్సిన పదార్ధాలు
-
కర్రీ కోసం
- 1 cup పచ్చి శెనగపప్పు
- 3 cups నీళ్ళు
- 2 tbsp నూనె
- 1/2 inch దాల్చిన చెక్క
- 1/2 బిరియానీ ఆకు
- 2 యాలకలు
- 2 లవంగాలు
- 1 tsp జీలకర్ర
- 1/2 cup ఉల్లిపాయ తరుగు
- 1/4 cup టొమాటో ముక్కలు
- 3 - 4 పచ్చిమిర్చి ముక్కలు
- 1 tsp అల్లం వెల్లులి పేస్ట్
- ఉప్పు
- 1/4 tsp పసుపు
- 1/2 tsp వేయించిన జీలకర్ర పొడి
- 1/2 tsp ధనియాల పొడి
- 1 tsp కారం
- 1/2 tsp మిరియాల పొడి
- 2 tbsp కొత్తిమీర తరుగు
- 1/4 cup ఆఖరున వేసే టొమాటో ముక్కలు
- 1/2 tsp గరం మసాలా
- 2 tbsp కొత్తిమీర తరుగు
-
ఆమ్లెట్ కోసం
- 4 గుడ్లు
- 1/2 tsp మిరియాల పొడి
- ఉప్పు
- 2 Pinches పసుపు
- 2 tbsp టొమాటో తరుగు
- 2 tbsp ఉల్లిపాయ తరుగు
- 1 tbsp పచ్చిమిర్చి సన్నని తరుగు
- 2.5 tbsp నూనె
విధానం
- కుక్కర్లో నూనె వేడి చేసి అందులో బిరియానీ ఆకు, లవంగాలు, యాలకలు, దాల్చిన చెక్క, జీలకర్ర వేసి వేపుకోవాలి.
- ఉల్లిపాయ సన్నని తరుగు వేసి ఉల్లిపాయ బంగారు రంగు వచ్చేదాకా వేపుకోవాలి. తరువాత టొమాటో అల్లం వెల్లులి పేస్ట్ పచ్చిమిర్చి ముక్కలు వేసి వేపుకోండి.
-
టొమాటో మెత్తబడ్డాక ఉప్పు, పసుపు, ధనియాల పొడి, కారం, జీలకర్ర పొడి, మిరియాల పొడి వేసి నూనె పైకి తేలేదాక వేపుకోవాలి
- తరువాత నానబెట్టిన పచ్చిశెనగపప్పు వేసి 2 నిమిషాలు వేపుకుని నీళ్ళు పోసి ఒక విసిల్ హై ఫ్లేమ్ మీద, 2 విసిల్స్ లో ఫ్లేమ్ మీద రానిచ్చి స్టెమ్ పోయే దాకా వదిలేయండి.
- గుడ్లులో ఆమ్లెట్కి కావాల్సిన పదార్ధాలన్నీ వేసి బాగా ఎక్కువ సేపు బీట్ చేసుకోండి. పాన్లో నూనె వేసి కాస్త మందంగా ఆమ్లెట్ వేసి 90% కాల్చుకోవాలి (పర్ఫెక్ట్ ఆమ్లెట్ కోసం టిప్స్ చూడండి)
-
ఆమ్లెట్ ని ముక్కలుగా కట్ చేసుకోండి
- స్టీమ్ పోయిన శెనగపప్పుని హై ఫ్లేమ్ మీద మరగనివ్వాలి. మరుగుతున్న పప్పులో టొమాటో ముక్కలు, గరం మసాలా కొత్తిమీర తరుగు ఆమ్లెట్ వేసి 2 నిమిషాలు ఉడికించి దింపేసుకోండి.
Leave a comment ×