కాకరకాయ వేపుడు | కాకరకాయ ఫ్రై | చేదు లేని కాకరకాయ వేపుడు

4.0 AVERAGE

కాకరకాయ వేపుడు | చేదు లేని కాకరకాయ వేపుడు కాకరకాయ ముక్కల్లో ఉప్పు పసుపు వేసి ఊరనిచ్చి, అందులో నుంచి పసరు పిండి నూనెలో ఉల్లి కాకరకాయ ముక్కలు వేసి ఎర్రగా వేపి ఉప్పు కారం బెల్లం వేసి చేసే ఈ తీరు కాకరకాయ వేపుడు కనీసం వారం రోజుల వరకు నిలవుంటుంది, వేడి అన్నంతో అద్భుతంగా ఉంటుంది.

కాకరకాయ వేపుడులు చాలా తీరుల్లో చేస్తారు, ఈ తీరు కాకరకాయ వేపుడు చేదు చాలా మితంగా ఉంటుంది, తీపి కారంతో కలగలిపిన రుచితో చాలా రుచిగా ఉంటుంది.

రెసిపీ ప్రింట్ చేయడానికి

టిప్స్

కాకరకాయ:

•కాకరకాయ ముక్కలని మీడియం సైజు ముక్కలుగా తరుక్కోండి. మరీ సన్ననివి తరుక్కుంటే వేగాక ఇంకా చిన్న పలుకులు మాదిరి అయిపోతాయి.

•నేను లేత కాకరకాయ వాడాను, మీరు కావాలనుకుంటే గింజలున్న కాకరకాయ కూడా వాడుకోవచ్చు. అలాగే గింజల్ని కూడా వేసి వేపుకుంటే చాలా బాగుంటుంది.

•మీరు చేదు తినే వారైతే కాకరకాయ పైన ఉండే చెక్కు తీయకుండా అలాగే సన్నని ముక్కలు తరిగి వేసుకోండి.

•చేదు తక్కువగా తినేవారైతే కాకరకాయ ముక్కల్లో ఉప్పు పసుపు వేసి ఊరనిచ్చి గట్టిగా పిండితే చేదుగా ఉండే పసరు దిగిపోతుంది. వేగాక కాకరకాయ చేదు చాలా మితంగా ఉంటుంది.

కాకరకాయ వేపే తీరు:

•కావలిసిన పదార్ధాలన్నీ నూనెలో వేసి మీడియం ఫ్లేమ్ మీద ముక్కలు మగ్గి ఎర్రబడడం మొదలవుతుంది అందాక వేపుకున్నాక బెల్లం సన్నని తరుగు వేసుకోవాలి. దింపేబోయే ముందు కారం వేసుకోవాలి. కారం ముందుగానే వేస్తే మాడిపోతుంది.

•ముక్కలు నిదానంగా వేగితే వేపుడు ఎక్కువ రోజులు నిలవుంటుంది.