వంకాయ కందిపప్పు ఇగురు

Curries

వంకాయ ముక్కలు మెత్తగా ఉడికించి అందులో నానబెట్టిన కందిపప్పు పచ్చిమిర్చి కొబ్బరి ముద్ద వేసి తాలింపు పెట్టె కమ్మని ఆంధ్రుల రెసిపీ వేడి అన్నంతో గొప్పగా ఉంటుంది.

ఇంకో విషయం ఏంటంటే ఇందులో ఉల్లి వెల్లులి లేదు. కాబట్టి పండుగలకు కూడా చేసుకోవచ్చు.

కూరల్లో రారాజు వంకాయ అంటారు తెలుగు వారు. తెలుగు వారికి వంకాయ గోంగూరా ఉంటె ఆ రోజు ప్రేత్యేకమే!!!

ఈ వంకాయ కందిపప్పు ఇగురు కూర దాదాపుగా తెలుగు వారు మరిచిపోయారు. ఇది వెనుకటి కాలం తీరు. ఈ కమ్మటి వంకాయ కూర నాకు 85 సంవత్సరాల బామ్మగారు నేర్పారు, ఇది వారి అత్తగారి స్పెషల్ రెసిపీ అని నాకు నాకు చెప్పారు. నేను వారింటికి వెళ్ళినప్పుడు భోజనానికి బీరకాయ పచ్చడితో పాటు ఈ కూర వడ్డించారు, నాకు చాలా నచ్చేసింది, వెంటనే ఎలా చేశారు ఈ కమ్మటి కూర అని అడిగి తెలుసుకున్నాను, ఆ రెసిపీనే మీకు పోస్ట్ చేస్తున్నాను.

ఈ వంకాయ కూర తెలిసీతెలియని పులుపుతో, కమ్మని కొబ్బరి, పచ్చిమిర్చి ఘాటుతో చాలా రుచిగా ఉంటుంది. ఇందులో ఎండు కారం లాంటివి వేయరు.

మీరు ఈ రెసిపీని కూడా ఇష్టపడవచ్ వంకాయ మెంతి కూర ఫ్రై

రెసిపీ ప్రింట్ చేయడానికి

టిప్స్

వంకాయలు:

ఈ కూరకి నీలం రంగు పొడవు వంకాయల రుచి చాలా బాగుంటుంది. ఇవి మూళ్ళ వంకాయలు అని కూడా అంటారు. ఇవి దొరకనట్లైతే తెల్లవి పొడవు వంకాయలైన వాడుకోండి కానీ ముదురు నీలం రంగులో ఉండే గుత్తి వంకాయలు వాడకండి. ముదురు నీలం రంగు వంకాయలు కాస్త వగరుగా ఉంటాయి.
వంకాయ ముక్కలు 80% చింతపండు నీళ్లలో ఉడికితే చాలు, పూర్తిగా మెత్తగా ఉడికితే కూర తయారయ్యే పాటికి గుజ్జుగా అయిపోతుంది.
వంకాయలు లేతగా ఉంటె గింజలు తక్కువగా ఉంటాయి వంకాయ మీగడలా కరిగిపోతుంది నోట్లో.

కందిపప్పు:

కడిగిన కందిపప్పు గంటకు పైగా నానబెట్టినవి వాడుకుంటే త్వరగా ఉడుకుతుంది. ఇక్కడ మీరు కందిపప్పుకి బదులు పెసరపప్పు, పచ్చిశెనగపప్పు లేదా ఉడికించుకున్న అలసందలు కూడా వాడుకోవచ్చు.