కడక్ రుమాలీ రోటీ

Snacks

టీ తో మాంచి జోడీ, కబుర్లు చెప్పుకుంటున్నప్పుడు లేదా సినిమా చూస్తున్నపుడు తింటూనే ఉండాలనిపించే బెస్ట్ స్నాక్ ఈ కడక్ రుమాలీ రోటీ. ఎప్పుడు చేసినా చిటికెలో ఖాళీ అయిపోయే సింపుల్ రెసిపీ స్టెప్ బై స్టెప్ ఇంజెస్ ఇంకా వీడియోతో ఉంది.

ఈ స్టైల్ “కడక్ రుమాలీ రోటీ” కరకరలాడుతూ కారంగా మెక్సికన్ నాచోస్తో సాల్సా కలిపి తింటున్నట్లుగా ఉంటుంది. ఇంకో రకంగా చెప్పాలంటే గుజరాతీ ఖాక్రాలా ఉంటుంది. పోలికలు ఎలా ఉన్నా తింటున్నప్పుడు మాత్రం మనసు నిండిపోతుంది

“కడక్ రుమాలీ రోటీ” మొదటగా నేను మూడేళ్ళ క్రితం హైదరాబాద్లోని ఒక రెస్టారెంట్లో చూశాను. ఏంటిది కొత్తగా ఉంది అనుకున్నా, ఆ తరువాత మరో హోటల్ బుఫేలో టేస్ట్ చేశా, చాలా నచ్చేసింది. కొన్ని రోజులు పోయాక ఈ కడక్ రుమాలీ రోటీలో ఎన్నో ఫ్లేవర్స్ ఉన్నాయి అని సోషల్ మీడియాలో చూసీ వావ్ అనుకున్నా!

కడక్ రుమాలీ రోటీ నేపాలీలు చాలా ఇష్టంగా తింటారట అక్కడ స్ట్రీట్ ఫుడ్గా దొరుకుతుంది అని ఒక ఫ్రెండ్ చెప్పాడు. బహుశా ఈ రెసిపీ అక్కడ నుండే పాపులర్ అయ్యి మన దాకా వచ్చి ఉండవచ్చు.

నేను చేస్తున్న రోటీకి కొంచెం మెక్సికన్ టచ్ ఇచ్చాను సాల్సాతో. మీకు నచ్చితే ఇంకేదైనా పద్ధతిలో అయినా చేసుకోవచ్చు. రోటీ కాల్చడంలో కొన్ని కచ్చితమైన టిప్స్ పాటిస్తే బెస్ట్ “కడక్ రుమాలీ రోటీ” వస్తుంది.

రెసిపీ ప్రింట్ చేయడానికి

టిప్స్

పిండి:

నేను కొంచెం గోధుమ మైదా కలిపి రోటీ చేశాను, నచ్చితే అచ్చంగా మైదా లేదా గోధుమ పిండితో రోటీ చేసుకోవచ్చు. లేదా జొన్న, రాగి ఇలా మరింకేదైనా పిండితో కూడా చేసుకోవచ్చు.
పిండిలో తక్కువ నీరు పోసి గట్టిగా వత్తుకోవాలి. ఇంకా పిండిని ఎంత ఎక్కువసేపు మర్ధనా చేస్తే అంత సాగుతుంది పిండి. అప్పుడు ఎంత పల్చగా పేపర్లా పిండిని వత్తినా చిరగదు రోటీ.
రోటీలు అన్నీ సరైన ఒకే తీరు ఆకారం కోసం పదునుగా ఉండే ప్లేట్తో కట్ చేసుకుంటే అన్నీ రోటీలు ఒకే తీరుగా వస్తాయ్.
రోటీ కాలచ్చాక గాలికి చల్లారానిస్తే ఇంకా కరకరలాడుతుంటుంది రోటీ.

రొటీలు కాల్చే టిప్స్:

“U” ఆకారంలో ఉండే మందపాటి ఇనుప మూడుకు మీద చాలా పర్ఫెక్ట్గా కాలతాయ్ రొటీలు.
రొటీలు ఎంత సేపైనా సన్నని సెగ మీదే కాల్చాలి అప్పుడు పిండిలోని చెమ్మారి రోటీ కరకరలాడుతూ వస్తుంది
రోటీ వేసే ముందు మూకుడు విపరీతమైన వేడిగా ఉండనే కూడదు, వేడిగా ఉండాలి అంతే!!! బాగా వేడిగా ఉంటే రోటీమీద నల్ల మచ్చలు ఏర్పడతాయ్ చూడడానికి అంత బాగుండదు.
రోటీని నెమ్మదిగా కాటన్ బట్టతో ప్రతీ మూల అద్దుతూ కాల్చుకోవాలి. అప్పుడు రోటీ పైన పొంగినట్లుగా బుడగలు ఏర్పడవు.