కడప కారం దోశ

5.0 AVERAGE

అట్లు ఎన్ని రకాలున్నా ఉన్నా నాలుక మీద చుర్రు మనిపించే కడప కారం దోశ రుచి ప్రేత్యేకం. ఆంధ్రాలోని కడప జిల్లాలో పొద్దున్నే ఏ వీధిలో చూసినా “కడప కారం దోశ” అంగడులు తారాసపడతాయ్. హోటల్స్లో కంటే ఎక్కువగా కారం దోశ రోడ్ల పక్క అమ్మే బండ్ల మీదే తినడానికి ఎక్కువగా ఇష్టపడతారు. నిజానికి బండ్ల మీద వచ్చే రుచి హోటల్స్లో రాదు.

ఎర్రని ఘాటైన కారం పూసి, పైన పప్పుల పొడి నెయ్యి వేసి కరకరలాడేట్టు కాల్చే అట్టు పుల్లని బొంబాయ్ చట్నీలో నంజుకు తింటుంటే ఆ మజా మాటల్లో వర్ణించలేనిది. కడప కారం దోశకి ఉన్న అభిమానులు అంతా ఇంతా కాదు అందుకే ఇప్పుడు కడప కారం దోశ ఇప్పుడు హైదరాబాద్ లాంటి నగరాల్లో కూడా బండ్ల మీదే దొరుకుతుంది.

రాయలసీమ ఫేమస్ కడప కారం దోశ రెసిపీలో నేను పర్ఫెక్ట్ అట్ల పిండి, ఘాటైన కడప స్టైల్ ఎర్ర కారం, పప్పుల పొడి బొంబాయ్ చట్నీ రెసిపీ వివరంగా చెప్తున్నా.

ప్రస్తుతానికి కారం దోశ రకరకాల రుచులతో దొరుకుతుంది అవన్నీ కూడా వివరంగా కింద టిప్స్లో ఉంది చూడండి.

రెసిపీ ప్రింట్ చేయడానికి

టిప్స్

దోశ పిండి/స్ట్రీట్ స్టైల్లో అట్టు కాల్చే తీరు :

దోశ పిండి మామూలు తెలుగు వారు చేసుకునే దోశ కొలతే కప్పు మినపప్పుకి 3 కప్పుల అట్ల బియ్యం కాసిని మెంతులు.
పప్పు బియ్యం నాలుగు గంటలు నాని తరువాత ఎక్కువసేపు మెత్తగా రుబ్బుకుని 16 గంటలు పులియబెట్టగలిగితే పిండి బాగా పులిసి అట్టు ఇంకా రుచిగా ఉంటుంది.
స్ట్రీట్ స్టైల్ అట్టులా కరకరలాడలంటే అట్టు పిండి కాసింత చిక్కగా కలుపుకోవాలి. ఇంకా పెనం చివరిదాకా కాకుండా పెనానికి మంట ఎక్కడ దాకా తగులుతుందో అక్కడి దాకా మాత్రమే పిండి స్ప్రెడ్ చేసుకుంటే అట్టు సమంగా ఒకే తీరుగా కాలుతుంది.
అట్టు బండ్ల మీద దొరికే తీరులో కరకరలాడాలంటే మాత్రం పిండి కాస్త చిక్కగా ఉండాలి కాసింత ఎక్కువ నూనె నెయ్యిలో నిదానంగా కాలాలి అప్పుడు నీరుగా ఉండే ఎర్రకారం పూసిన అట్టు మెత్తబడదు.

ఎర్ర కారం:

వెనుకటికి అట్లకి పూసే కడప ఎర్రకారం అంటే వట్టి ఎండుమిర్చి, వెల్లులి, ఉప్పు వేసి మెత్తగా రోట్లో నూరే వారు. కానీ ఇప్పుడు కొందరు కాసింత చింతపండు కూడా వేస్తున్నారు నచ్చితే మీరు వేసుకోవచ్చు. నేను వెల్లులి కూడా కారంలో వేయలేదు పప్పుల పొడిలో వెల్లులి సరిపోతుందని. నచ్చితే కొంచెం వేసుకోండి
కారం ఎప్పుడు కూడా అట్టు ఎర్రగా రెండు వైపులా కాలాక తిప్పి పూసుకోవాలి. అట్టు ఒక వైపు ఎర్రబడ్డాక పూస్తే అట్టు అంత రుచిగా ఉండదు.

పప్పుల పొడి:

మామూలుగా చేసుకునే పప్పుల పొడిలో చింతపండు ఎండుమిర్చి వెల్లులి వేస్తారు. కానీ కారం దోశలో చల్లే పొడికి వట్టి వెల్లులి వేసి మెత్తని పొడి చేస్తారు.

బొంబాయ్ చట్నీ:

దక్షిణ భారత దేశంలో ఎక్కువగా ఈ బొంబాయ్ చట్నీ చేస్తారు. అందులోనూ ఆంధ్రాలో చాలా ఎక్కువగా చేస్తారు. ఈ చట్నీ రాష్ట్రానికి ఒక్కో తీరుగా చేస్తారు. ఆంధ్రుల తీరు చింత పులుసులో శెనగపిండి వేసి మరిగించి పల్చగా దింపుతారు.
బొంబాయ్ చట్నీ ఒక్క పొంగు రాగానే దింపేసుకోవాలి లేదంటే చల్లారాక చిక్కబడుతుంది. ఒక వేళ చల్లారాక చిక్కబడితే వేడి నీళ్ళు కొద్దిగా ఉప్పు వేసి పలుచన చేసుకోవచ్చు.

ఇంకొన్ని విధానాలు:

ఈ మధ్య కొందరు బొంబాయ్ చట్నీ అట్టు మీదే పోసి ఇస్తున్నారు. నాకు అట్టు మీద బొంబాయ్ చట్నీ పోసుకుని తినడం అంతగా నచ్చలేదు కాబట్టి, నేను విడిగా నంజుకు తినేలా ఉంచాను. నచ్చితే కారం పూసక చిక్కని బొంబాయ్ చట్నీ అట్టు మీద పోసుకుని వెంటనే తేసేయాలి లేదంటే అట్టు మెత్తగా అవుతుంది
నచ్చితే అట్టు మీద కారం పూశాక గుడ్డు కొట్టి వేసి కాల్చుకుని తీసుకోవచ్చు. కానీ గుడ్డు వేసుకోవాలంటే అట్టు ఒకవైపు కాలితే చాలు
అట్టు అచ్చంగా నెయ్యితోనే కాల్చుకోవచ్చు, లేదా నాలా అంచుల వెంట నూనె మధ్యన నెయ్యితో కాల్చుకోవచ్చు. ఈ అట్టుకి నూనె ఎక్కువగా ఉంటేనే రుచి.