టమాటో బాత్ | టొమాటో ఉప్మా

5.0 AVERAGE

ఈ రెసిపీని టమాటో బాత్ అని ఆంధ్రాలో అంటారు. దీన్నే తమిళనాడులో కిచిడీ అంటారు. కర్ణాటకలో మాత్రం రవ్వతో కాక రైస్ తో చేసే చేసే దాన్ని టొమాటో బాత్ అంటారు.

నేను ఆంధ్ర వాళ్ళు ఎంతో ఇష్టంగా చేసుకునే టొమాటో బాత్ రెసిపి చేస్తున్నా. ఒక రకంగా ఇది టొమాటో ఉప్మా. ఇది ఆంధ్రాలో పెళ్ళిళ్ళలో టిఫిన్ గా పెడతారు కూడా. బొంబాయ్ రవ్వ లో టొమాటో ముక్కలు వేసి చేస్తారు. నాకు ఈ రెసిపి రోజూ చేసి పెట్టినా చాలా ఇష్టంగా తింటాను.

సహజంగా ఉప్మా అనగానే చిరాకు పడతారు, కాని చేసే తీరు, వండే పధ్ధతిలో చేస్తే రోజూ పెట్టిన తింటారు. అలా రోజూ చేసుకుని తినేంత బాగుంటుంది ఈ టొమాటో బాత్. ఇది లంచ్ బాక్సులకి కూడా చాలా పర్ఫెక్ట్.

ఈ టొమాటో బాత్ కారం పొడి లేదా సెనగపప్పు చట్నీతో చాలా రుచిగా ఉంటుంది.

రెసిపీ ప్రింట్ చేయడానికి

టిప్స్

హోటల్ లో చేసే టొమాటో బాత్ ఎందుకంత రుచిగా ఉంటుంది:

• రవ్వ ని వేపే తీరులో రుచి ఆధారపడి ఉంది. రవ్వని సన్నని సెగ మీద కలుపుతూ వేపితే ఉప్మా రుచి, రూపం చాలా బాగుంటుంది

• రవ్వని నెయ్యి లో వేపితే టొమాటో బాత్ రుచి సువాసన చాలా గొప్పగా ఉంటుంది. నచ్చితే అచ్చంగా నెయ్యితో చేసి చూడండి, భలేగా ఉంటుంది.

• తాలింపు కరకరలాడేట్టు వేపితే ఎసరులో ఉడికినా ఇంకా కాస్త పలుకుగానే ఉండి చాలా రుచిగా ఉంటుంది

• జీడిపప్పు ముందు వేపి తీసి ఆఖరున కలిపితే జీడిపప్పు మెత్తబడదు. కరకరలాడుతూ రుచిగా ఉంటుంది. నచ్చితే మెత్తగానూ తినవచ్చు ఎసరులో ఉడికించి

• కూరకాయలు మరీ మెత్తగా వేపితే ఎసరులో ఉడికి మెత్తగా అయిపోయి ఉప్మాలో కలిసిపోయి నోటికి అందవు. అందుకే 80% వేపుకుంటే మిగిలినది ఎసరులో మగ్గిపోతుంది.

• ఆఖరున వేసే కాస్త నెయ్యి కొద్దిగా కొత్తిమీర పరిమళం చాలా బాగుంటుంది.