కాజు మఖాన కర్రీ
వేపిన జీడిపప్పు పూల్ మఖానా వేసి చిక్కని ఘాటైన గ్రేవీతో ఎంత తిన్నా ఇంకా తినాలనిపించే ఆంధ్రా పెళ్లిళ్ల స్పెషల్ కర్రీ చపాతీ పూరీలతో ఒక అద్భుతం!!!
ఈ మధ్య ఆంధ్రా పెళ్లిళ్లకి కేటరర్స్ పూల్ మఖానా కలిపి ఏదో ఒక కాంబినేషన్లో ఒక కూర తప్పక చేస్తున్నారు. భోజనాల్లో స్వీట్ పెట్టిన తరువాత రోటీతో పాటు ఒక మఖానా కర్రీ తప్పనిసరైపోయింది.
ఆంధ్రా కేటరర్స్ మఖానా కర్రీ చాలా తీరుల్లో చేస్తారు. కొన్ని సార్లు కూరగాయలు ఇంకో సారి గ్రేవీలో చిన్న చిన్న మార్పులతో దాదాపుగా ఒకే తీరులో చేస్తుంటారు. నేను అందులోంచి ఈ కాజు మఖనా కర్రీ రెసిపీ చేస్తున్నాను అది కూడా నా తీరులో చేస్తున్నా!!!
ఆంధ్రా తీరు అంటే కొంచెం కారం మసాలా పాళ్ళు ఎక్కువగా వేసి చేస్తారు. ఈ కూర భోజనాల్లో రోటీ తరువాత పెట్టె పులావుల్లోకి కూడా సరిపోయేలా ఉండాలనే తీరులో చేస్తారు.
నేను పెళ్లిళ్ల కేటరర్స్ తీరులో కారంగా ఘాటుగా కాకుండా, ఉప్పు కారాల ఘాటు తక్కువగా ఉండేలా చేస్తున్నాను. కాబట్టి ఈ కూర పూరీ చపాతీ రోటీల్లోకి చాలా రుచిగా ఉంటుంది, ఇంకా పులావ్లోకి కూడా చాలా బాగుంటుంది.
టిప్స్
జీడిపప్పు:
వేపిన జీడిపప్పు బద్దల కంటే గుండ్లు చాలా రుచిగా ఉంటాయి కూరలో. నచ్చితే మీరు బద్దలైన వాడుకోండి
ముఖానా:
మఖానా సన్నని సెగ మీద కరకరలాడేట్టు నిదానంగా రంగు మారకుండా కలుపుతూ ఎర్రగా వేపుకోవాలి. మఖానా కరకరలాడేట్టు వేగకపోతే కూరలో వేసిన తరువాత మఖానా లోపల పచ్చిగా ఉంటుంది, మసాలా పీల్చుకోదు.
గసగసాలు:
దక్షిణాది వారి కూరల్లో గసగసాలు చాలా ఎక్కువగా వాడతారు. నిజానికి గసగసాల రుచి చాలా బాగుంటుంది గ్రేవీలో. లేని వారు దొరకని వారు జీడిపప్పు వాడుకోండి. కానీ గసాలు ఉండాలి, ఉంటె ఆ రుచి ప్రేత్యేకం అని అర్ధం చేసుకోండి.
గ్రేవీ రుచి కోసం:
గ్రేవీని సన్నని సెగ మీద ఎక్కువసేపు మరగాలి. అప్పుడే మసాలాల్లోని సారం అంతా గ్రేవీలోకి దిగుతుంది. ఇంకా చిక్కబడుతున్న గ్రేవీని కలుపుతూ ఉండాలి, లేదంటే అడుగుపెట్టేస్తుంది.
ఆఖరుగా:
మఖానా గ్రేవీలో వేసాక 2 నిమిషాలు ఉడికిస్తే చాలు. అంత కంటే ఎక్కువగా మరిగితే మఖానా గుజ్జుగా అయిపోతుంది.
కాజు మఖాన కర్రీ - రెసిపీ వీడియో
Kaju Makhana curry | Phool Makhana Gravy Curry
- Prep Time 5 mins
- Cook Time 25 mins
- Total Time 30 mins
- Servings 5
కావాల్సిన పదార్ధాలు
- 75 gms జీడిపప్పు గుండ్లు
- 1 cup పూల్ మఖానా (పెద్ద కప్పు)
-
గ్రేవీ కోసం:
- 4 tbsp నూనె
- 1 inch అల్లం
- 7 - 8 వెల్లులి
- 1 cup ఉల్లిపాయ
- 1/4 cup ఎండుకొబ్బరి
- 4 - 5 పచ్చిమిర్చి
- 1/4 cup మిరియాలు
- 1 tbsp గసగసాలు
- 2 టమాటో
- 1/2 cup పెరుగు
-
కర్రీ కోసం
- 2 tbsp నూనె
- 1/4 tsp పసుపు
- 1 tsp ధనియాల పొడి
- 1/4 tsp జీలకర్ర పొడి
- మసాలా గ్రేవీ
- 1.5 cup నీళ్లు
- ఉప్పు - రుచికి సరిపడా
- 1 tsp నెయ్యి
- కొత్తిమీర - కొద్దిగా
విధానం
- 2 tbsp నూనె వేడి చేసి అందులో జీడిపప్పు వేసి ఎర్రగా వేపి తీసుకోండి. మిగిలిన నూనెలో మఖనా వేసి సన్నని సెగ మీద కరకరలాడేట్టు వేపి తీసుకోవాలి.
- గ్రేవీ కోసం ఇంకో 2 tbsp నూనె వేసి అందులో మసాలా దినుసులు, ఉల్లి పచ్చిమిర్చి కొబ్బరి వేసి ఉల్లిపాయ లేత బంగారు రంగు వచ్చేదాకా వేపుకోవాలి.
-
వేగిన ఉల్లిపాయలో గసాలు వేసి చిట్లనివ్వాలి. చిట్లిన గసాల్లో టమాటో ముక్కలు వేసి మెత్తబడేదాకా వేపుకోవాలి.
- వేగిన ఉల్లి టమాటో మిశ్రమాన్ని మిక్సీలో వేసుకోండి ఇంకా ఇందులో పెరుగు వేసి నీళ్లలో క్రీమ్ మాదిరి మెత్తని పేస్ట్ చేసుకోండి.
- కర్రీ కోసం ఉంచిన నూనె వేడి చేసి అందులో పసుపు ధనియాల పొడి జీలకర్ర పొడి కొద్దిగా నీళ్ళూ వేసి మసాలాలు మాడకుండా వేపుకోవాలి.
-
వేగిన మసాలాల్లో గ్రైండ్ చేసుకున్న మసాలా పేస్ట్, నీళ్లు, ఉప్పు వేసి కలిపి మూత పెట్టి నూనె పైకి తేలేదాక మధ్య మధ్యన కలుపుతూ గ్రేవీ చిక్కబరచాలి (మరీ చిక్కబడితే కొద్దిగా నీళ్లు పోసి పలుచన చేసుకోండి).
- చిక్కబడి నూనె పైకి తేలుతుంది 12-15 నిమిషాలకి అప్పుడు వేపుకున్న జీడీపప్పు మఖానా కొత్తిమీర తరుగు నెయ్యి వేసి కలిపి 2 నిమిషాలు ఉడికించి దింపేసుకోండి.
- ఈ కర్రీ స్పైస్ రోటీలు చపాతీతో పర్ఫెక్టుగా ఉంటుంది, ఇంకా స్పైసీ పులావుతో కూడా సరిపోయేలా ఉంటుంది. అదే వైట్ రైస్లోకి అయితే మసాలాల మోతాదు కొంచెం పెంచుకోండి.
Leave a comment ×
68 comments