పెసర పునుకులు అల్లం పచ్చడి | పెసర పునుకులు అల్లం పచ్చడితో | పెసర పునుకులు | అల్లం పచ్చడి

Andhra Specials

పెసర పునుకులు అల్లం పచ్చడి- నానబెట్టిన పెసలలో పచ్చిమిర్చి, అల్లం, జీలకర్ర, ఉప్పు వేసి మెత్తగా రుబ్బుకుని అందులో కరివేపాకు, వంటసోడా వేసి బాగా కలిపి నూనెలో బోండాలుగా వేసి తీసే ఈ పునుకులు ఆంధ్ర కోనసీమ ప్రాంతం స్పెషల్ రెసిపీ.

ప్రత్యేకించి కోనసీమలో సాయంత్రాలు ఈ పెసరపునుకులు ఏ వీధి చివర్న బండి దగ్గరికి వెళ్లినా అల్లం పచ్చడితో ఇస్తారు. వేడి మీద ఒకటి తినడం మొదలెడితే ఇంకా ఎన్ని తింటామో అంతే ఉండదు అంత రుచిగా ఉంటాయి.

ఈ రెసిపీలో నేను బండ్ల మీద అమ్మే పెసర పునుకులతో పాటు ఇచ్చే అల్లం పచ్చడి రెసిపీ కూడా చెబుతున్నాను. తప్పక ట్రై చేయండి చాలా నచ్చేస్తుంది మీకు.

రెసిపీ ప్రింట్ చేయడానికి

టిప్స్

పెసరపప్పు:

నేను ముడి పెసలు వాడుతున్నాను, మీరు కావాలంటే పొట్టులేని ఛాయా పెసరపప్పు కూడా వాడుకోవచ్చు.
నిజానికి బండ్ల మీద అమ్మే పెసరపునుకులు ఛాయా పెసరపప్పుతోనే చేస్తారు, కాకపోతే వారు చాలా ఎక్కువగా వంట సోడా వేసి చేస్తారు.
నిజానికి చూడ్డానికి ఛాయ పెసరపప్పుతో చేసే పునుకులు ఆకర్షణీయంగా ఉంటాయి, పొట్టు పప్పుతో చేసే పునుకులు మాత్రం తినడానికి కరకరలాడుతూ చాలా రుచిగా ఉంటాయి.

పునుకులు గుల్లగా రావాలంటే:

పప్పుని మెత్తగా రుబ్బుకోవాలి. నిజానికి మిక్సీలో రుబ్బుకోవడం కంటే గ్రైండర్లో రుబ్బుకుంటే చాలా బాగా వస్తాయి.
నేను మిక్సీలో రుబ్బాను అందుకే ఎక్కువసేపు బాగా వేగంగా బీట్ చేశాను. మిక్సీలో రుబ్బుకునే వారు తప్పక బాగా బీట్ చేసుకోవాలండి అప్పుడే పిండి తేలికపడి గుల్లగా కరకరలాడుతూ వస్తాయి పునుకులు.
ఎంత బాగా బీట్ చేసుకున్నా కొద్దిగ వంట సోడా వేసుకుంటే పునుకులు మరింత రుచిగా ఉంటాయండి.

అల్లం పచ్చడి:

సాధారణంగా పెసరపునుకులతో మరింకేదైనా పచ్చడి కంటే అల్లం పచ్చడి చక్కని జోడి.
ఈ అల్లం పచ్చడిలో కేవలం పచ్చిమిర్చి అల్లం చింతపండు బెల్లం ఉప్పు వేసి చేస్తారు. నిజానికి ఈ పచ్చడికి నిర్దిష్టమైన కొలత అంటూ ఏమి లేదు. ఏదో చెప్పడానికి చెబుతాము కానీ, రుచి చూసి కారానికి తగినట్లు ఉప్పు పులుపు బెల్లం సరిచేసుకోవాలి.