టొమాటో పుదీనా పచ్చడి
3 Comments
టిఫిన్ సెంటర్ల లో ఇడ్లీ అట్టులలోకి పప్పు పచ్చడితో పాటు టొమాటో పచ్చడి కూడా ఇస్తుంటారు. చాలా రుచిగా ఉంటుంది. అదే రుచి కొన్ని సింపుల్ టిప్స్ పాటిస్తే ఇంట్లోనే ఆ రుచి తీసుకురావొచ్చు.
గొప్పగా ఆదరణ పొందినవాటి వెనక చిన్న చిట్కాలే ఉంటాయ్ అనే మాట ఈ పచ్చడి రెసిపి తెలుసుకున్నప్పుడు అనిపించింది. మా ఇంట్లో చాలా ఎక్కువగా ఈ పచ్చడి చేస్తుంటాము. ఈ స్టైల్ పచ్చడి అట్టు ఇడ్లీ చపాతీలలోకి చాలా రుచిగా ఉంటుంది.
ఈ పచ్చడి తిరుపతి కర్నూల్ వైపు ఎక్కువగా చేస్తుంటారు, ఇంకా తమిళనాడులో కూడా. నేను ఇది వరకు సుమారుగా 7-8 పచ్చళ్లు పోస్ట్ చేశాను. అన్నీ వేటికవే ప్రేత్యేకం.
ఎప్పుడు చేసినా ఒకే లాంటి రుచి రావాలంటే మాత్రం ఎంచుకునే పదార్ధాలు వండే తీరు మీద ఆధారపడి ఉంటుంది. అలాంటి టిప్స్ అన్నీ రెసిపిలోని టిప్స్ లో వివరంగా ఉంది చూడండి .
రెసిపీ ప్రింట్ చేయడానికి 
టిప్స్
-
పచ్చడికి కాస్త నూనె ఉంటేనే బాగుంటుంది
-
వెల్లుల్లి పాయాలు తగ్గించుకోవచ్చు లేదా వదిలేవచ్చు. వెల్లుల్లి ఆచ్చి వాసన పోతే చాలు
-
పచ్చి మిర్చి కూడా పచ్చి వాసన పోయేంత వరకు వేపితే చాలు. మిరపకాయలు కాస్త కారంగలవి అయితే రుచి
-
పచ్చడి మరీ మెత్తగా పేస్ట్ లా గ్రైండ్ చేయకండి.
-
ఈ పచ్చడికి కరివేపాకు తాలింపు వేయకండి , పుదీనా సువాసన తగ్గుతుంది
టొమాటో :
• టొమాటోలు నాటువు అయితే పుల్లగా రుచి బాగుంటాయ్. హైబ్రీడ్ కాయలైతే ఇంకాస్త ఎక్కువ చింతపండు వేసుకోండి
• టొమాటోలు మరీ మెత్తగా పూర్తిగా నీరు ఇగిరిపోయేదాక మగ్గించకూడదు . అలా చేస్తే అంతా రుచిగా ఉండదు పచ్చడి. టొమాటోలు ఇంకా నీరుగా ఉండి మెత్తబడితే చాలు. అంటే టొమాటో పైన తోలు ఉడిపోతే చాలు.
పుదీనా :
• గుప్పెడు పుదీనా ఆకులు మాత్రమే వేసి ఒక నిమిషం అంత కంటే మగ్గించకుండా దింపేసుకోవాలి
• పుదీనా కి బదులు కొత్తిమీర కాడలతో లేదా మెంతి కూర ఆకులు కూడా వేసుకోవచ్చు
నువ్వులు :
• నువ్వులు సన్నని సెగ మీద కలుపుతూ వేపితేనే సమానంగా వేగుతాయ్
• నువ్వులకి బదులు వేరు సెనగప్పు/పచ్చి శెనగపప్పు కూడా వాడుకోవచ్చు
టొమాటో పుదీనా పచ్చడి - రెసిపీ వీడియో
Tomato Mint Chutney | Tomato Pudina Chutney | Tomato Pudhina Chutney
Prep Time 5 mins- Cook Time 15 mins
- Total Time 20 mins
Servings 8
కావాల్సిన పదార్ధాలు
- 4 పండిన ఎర్రని టొమాటోలు
- గుప్పెడు పుదీనా ఆకులు
- 3 tbsp నువ్వులు
- 8 -10 పచ్చిమిర్చి
- 20 వెల్లుల్లి
- 1 tsp జీలకర్ర
- ఉసిరికాయంత చింతపండు
- ఉప్పు
-
తాలింపుకి
- 1 tbsp నూనె
- 1 tsp ఆవాలు
- 1 tbsp సెనగపప్పు
- 1 tsp మినపప్పు
- 1 tsp జీలకర్ర
విధానం
-
మూకుడులో నువ్వులు వేసి సన్నని సెగ మీద కలుపుతూ చిటపటలాడించి దింపి మెత్తని పొడి చేసుకోండి.
-
నూనె వేడి చేసి అందులో పచ్చిమిర్చి చీలికలు , జీలకర్ర , వెల్లుల్లి వేసి 2 నిమిషాలు వేపుకోండి.
-
వేగిన వెల్లుల్లి లో పండిన టొమాటో ముక్కలు కాస్త ఉప్పు, చింతపండు వేసి టొమాటోలు మెత్తబడి పైన తోలు ఊడే దాకా మగ్గించుకోవాలి.
-
మగ్గిన టొమాటో ముక్కల్లో పుదీనా ఆకులు వేసి వ నిమిషం మగ్గనిచ్చి దింపేసుకోవాలి .
-
చల్లారిన టొమాటోలని మిక్సీ వేసి నీరు చేర్చి బరకగా రుబ్బుకోండి.
-
తాళింపుకి నూనె వేడి చేసి అందులో ఆవాలు సెనగపప్పు మినపప్పు వేసి ఎర్రగా వేపుకోవాలి.
-
వేగిన తాళింపులో టొమాటో గుజ్జు ఇంకా నువ్వుల పొడి వేసి నూనె పైకి తేలేదాక మగ్గించి దింపేసుకోవాలి.
Leave a comment ×
3 comments