కర్నూల్ స్పెషల్ ఉగ్గాని

5.0 AVERAGE

కొన్ని రెసిపీస్ పుట్టిన చోట కంటే ఎక్కువమంది ఇష్టపడే చోటే ఆదరణ ఎక్కువ, అలాంటిదే కర్ణాటక స్పెషల్ రెసిపీ వాగ్గాని, అదే ఆంధ్రప్రదేశ్లో ఉగ్గానిగా మారింది.

కర్ణాటక రాష్ట్రానికి పక్కనే ఉన్న కర్నూల్ అనంతపూర్ జిల్లాల వారు బొరుగులతో చేసే ఈ వంటకాన్ని ఎంతో ఇష్టంగా తింటారు. నిజానికి ఉగ్గాని వారికి ఏదో ఉదయాన్నే సులభంగా చేసుకునే రెసిపీ కాదు, ఒక అనుబంధం అని చెప్పాలి.

ఉగ్గానితో మిరపకాయ బజ్జీ నంజుకుంటూ ఆంధ్రాలోని రాయలసీమ ప్రాంతం అంతా చాలా ఇష్టంగా తింటారు. ముఖ్యంగా కర్నూల్ అనంతపూర్ జిల్లాల వారు. ఇంకా ఆ జిల్లాలకి పక్కనే ఉన్న తెలంగాణాలోని గద్వాల్ వైపు కూడా ఉదయాన్నే తింటారు.

బొరుగులు ఉల్లిపాయ టొమాటో ముక్కల తరుగు వేసి చేసే ఈ ఉగ్గాని చూడడానికి ఆకర్షణీయంగా చేయడానికి సులభంగా ఉంటుంది. రెసిపీ 15 నిమిషాల్లో తయారవుతుంది, కానీ కొన్ని టిప్స్ పాటిస్తే సరిగ్గా రాయలసీమ వారు చేసే తీరు ఉగ్గాని రుచి వస్తుంది. దాని కోసం టిప్స్ చూడండి.

రెసిపీ ప్రింట్ చేయడానికి

టిప్స్

బొరుగులు/మరమరమరాలు :

ఉగ్గానికి పల్చని బొరుగులు పనికి రావు. తెలుగు రాష్ట్రాలలో ప్రేత్యేకించి కర్నూల్ బొరుగులు అని దొరుకుతాయ్ అవే వాడాలి. ఆ బొరుగులు అయితేనే నీళ్ళలో నానినా బరువు తగ్గవు. అందుబాటులో ఉండే మరో రకం బొరుగులు కూడా వాడుకోవచ్చు, కానీ బొరుగులు నీళ్ళలో వేసిన 2 నిమిషాలకే పిండి తీసేయాలి. లేదంటే మెత్తగా అయిపోతాయ్.
బొరుగులు కొద్దికొద్దిగా తీసుకుని నీళ్ళలో వేసి 2 నిమిషాలు బాగా తడిపి నీళ్ళని పిండి జల్లెడలో వేయాలి. ఒకే సారి బొరుగులన్నీ వేసినా సరిగా నీళ్ళలో నానబెట్టకపోయినా ఉగ్గాని అంత రుచిగా అనిపించదు.
బొరుగుల నుండి నీరు పిండిన వెంటనే ఉప్పు వేసి ఉంచితే ఉప్పు బొరుగులు బాగా పట్టుకుంటాయ్.

మరికొన్ని టిప్స్:

ఉగ్గాని ఇంటికో తీరుగా చిన్న చిన్న మార్పులతో చేస్తారు. నేను కర్నూల్లో అందరికీ తెలిసినది, చేసే తీరులో చేస్తున్నా.
నేను పప్పుల పొడి వేసి చేశాను, ఇంకొందరు అచ్చంగా కొబ్బరి పొడి చల్లి కూడా చేస్తారు.
ఉగ్గానిలో సాధారణంగా పులుపు వేయరు. కొందరు వేసుకుంటారు నిమ్మకాయ పిండే వారు ఆఖరున పిండుకుంటారు. చింతపండు పులుసు అయితే టొమాటో ముక్కల్లో ఉడికిస్తారు.
ఉగ్గాని లో వేసే ఉల్లి, టొమాటో ముక్కలు ఏవీ మెత్తగా మగ్గిపోకూడదు. పచ్చి వాసన పోతే చాలు.
ఉగ్గానిలో నచ్చితే పచ్చిమిర్చి తరుగు వేసుకోవచ్చు, నేను పచ్చిమిర్చి దంచి వేశాను. ఇలా దంచి వేస్తే రుచి చాలా బాగుంటుంది. ఇంకా రంగు కోసం కొద్దిగా కారం వేశాను. కావాలంటే కారం వేయకపోయిన పర్లేదు.