బెస్ట్ దాల్ ఖమన్

Breakfast Recipes

స్నాక్ అనే అనండి బ్రేక్ఫాస్ట్ అనే అనుకోండి లేదా పార్టీ స్టార్టర్ అనండి ఎప్పుడైనా పర్ఫెక్ట్ గుజరాత్ స్పెషల్ దాల్ ఖమన్. పుల్లగా కారంగా తియ్యగా మృదువుగా చాలా రుచిగా ఉంటుంది. అసలు గుజరాతీ ఖమన్ తినడానికి ఒక సమయం సందర్భం అవసరం లేదు ఎప్పుడైనా పర్ఫెక్ట్ అంటారు గుజరాతీలు.

ఖమన్-ఢోక్లా పేర్లలో గుజరాతేతరులకి చిన్న సందేహం ఉంటుంది. ఢోక్లా , ఖమన్ రెండూ పూర్తిగా భిన్నం. ఢోక్లా తెల్లగా ఉంటుంది, బియ్యం కొద్దిగా మినపప్పు కలిపి చేస్తారు. ఖమన్ శెనగపప్పు లేదా శెనగపిండితో చేస్తారు. గుజరాతీలకి తప్ప దాదాపుగా ఖమన్ ఢోక్లాకి వ్యత్యాసం తెలియదు. మిగిలిన వారు అన్నింటినీ ఢోక్లా అనే అంటారు. నేను కూడా అందరికీ సులభంగా అర్ధమవడానికి “ఢోక్లా” అనే టైటిల్ పెట్టాను

“దాల్ ఖమన్తో” ఎందరో గుజారాతీల రోజు మొదలవుతుంది అంటే ఆశ్చర్యం లేదు. దక్షిణభారత దేశం వారికి ఇడ్లీ అట్టు ఇడియప్పంతో ఎలా రోజు మొదలో వారికి ఖమన్, ఫాఫ్డా, ఘాటియా, జీలేబీతో రోజు మొదలవుతుంది.

దాల్ ఖమన్ ఒక రకంగా ఇడ్లీ లాంటిదే. కాకపోతే శెనగపప్పు చేసే ఇడ్లీ అనాలి. శెనగపిండితో చేసే ఖమన్ రుచి, దాల్ ఖమన్ రుచి భిన్నం. దేనికదే ప్రేత్యేకం. దాల్ ఖమన్కి పిండిని పులియబెట్టి చేస్తారు. దాల్ ఖమన్ చేయడంలో చిన్నవే అయినా పొరపాటు జరిగితే ఖమన్ మృదువుగా ఉండదు. తింటున్నప్పుడు గొంతు చుట్టుకుంటుంది. అలా అవ్వకుండా పర్ఫెక్ట్ ఖమన్ కోసం చిన్న చిట్కాలు కొలతలు పాటిస్తూ చేయండి. 100% బెస్ట్ ఖమన్ వచ్చి తీరుతుంది.

రెసిపీ ప్రింట్ చేయడానికి

టిప్స్

గ్రైన్డింగ్ టిప్స్:

శెనగపప్పు, బియ్యం మినపప్పుని సన్నని రవ్వలా రుబ్బుకోవాలి.
రుబ్బిన పిండిని బాగా బీట్ చేయాలి అప్పుడే పిండిలోకి గాలి చేరి బాగా పొంగుతుంది.
పిండి ఐదు గంటలు పులిస్తే చాలు. చలికాలంలో అయితే రాత్రంతా పులిసినా పర్లేదు. వేసవిలో రాత్రంతా వదిలేస్తే మరీ ఎక్కువగా పులిసిపోతుంది. అప్పుడు వంట సోడా వేయకండి.
పిండిలో నూనె వేసి కలపడం వల్ల ఖమన్ ఎంతో మృదువుగా వస్తుంది, లేదంటే గొంతుకి చుట్టుకుంటుంది

నిమ్మ ఉప్పు:

నిమ్మ ఉప్పు ఖమన్కి నిమ్మరసం కంటే చక్కని పులుపుని ఇస్తుంది.

పంచదార:

గుజరాతీలు పులుపు తీపి కారం కాలగలపుని ఇష్టంగా తింటారు. తీపి ఇష్టపడని వారు వదిలేవచ్చు.