ఆంధ్రా పనీర్ బటర్ మసాలా

Curries

5.0 AVERAGE

ఫ్రెష్ క్రీమ్స్, కాశ్మీరీ కారం ఇవేవి వేయకుండా పనీర్ని ఎర్రగా వేపి ఘాటైన ఆంధ్రా స్టైల్ ఘాటైన టమాటో గ్రేవీలో వేసి చేసే వెడ్డింగ్ స్టైల్ పనీర్ బటర్ మసాలా పంజాబీ పనీర్ బటర్ మసాలాకి ధీటుగా ఉంటుంది.

కారం ప్రియులు తెలుగు వారు. ఎందులోనైనా కారం కాస్త దండిగా ఉంటేనే తృప్తి. కమ్మగా పాల మీగడ వేసి చేసే పంజాబీ పనీర్ బటర్ మసాలా అంత సులభంగా తెలుగు వారికి నచ్చదు. మీకు తెలుగు రాష్ట్రాల్లో పనీర్ బటర్ మసాలా పేరుతో దొరికే రెసిపీ అసలైన పంజాబీ తీరులో ఉండదు. తెలుగు వారి పనీర్ బటర్ మసాలా ఘాటుగా కారంగా ఉంటుంది. కమ్మటి కూరలు అంతగా ఇష్టపడరు తెలుగు వారు.

అందుకే తెలుగు కేటరర్స్ తెలుగు వారికి నచ్చే తీరులో పనీర్ బటర్ మసాలా మార్చేసి పెళ్లిళ్లలో రోటీతో వడ్డిస్తున్నారు. తెలుగు వారి పనీర్ బటర్ మసాలా రోటీలతోనే కాదు అన్నంతో కూడా చాలా రుచిగా ఉంటుంది.

తెలుగు వారి పనీర్ బటర్ మసాలాలో పంజాబీ తీరుకి మల్లె కాశ్మీరీ కారం, ఆఖరున ఫ్రెష్ క్రీమ్ లాంటివి ఏవీ వేయరు, ఇంకా కొద్దిగా టమాటో కెట్చప్ కూడా వేస్తారు. పనీర్ని కూడా నూనెలో లేత బంగారు రంగు వచ్చేదాకా వేపి గ్రేవీలో వేస్తారు.

నిజం చెప్పేదా...నాకూ పంజాబీ తీరు కంటే తెలుగు వారి పనీర్ బటర్ మసాలా రోటీలు పూరిలతో చాలా రుచిగా అనిపిస్తుంది. తెలుగు వారి తీరు కూడా దాదాపుగా పంజాబీ పనీర్ బటర్ మసాలాలానే, కానీ వేసే పదార్ధాలు వాటి కొలతలు భిన్నం, చేతికో రుచి అంటుంటారు కదా ఆలా ఇది కూడా!!!

మీరు ఈ రెసిపీని కూడా ఇష్టపడవచ్చుగోంగూర పనీర్

రెసిపీ ప్రింట్ చేయడానికి

టిప్స్

పనీర్:

పనీర్ని లేత బంగారు రంగు వచ్చే దాకా మాత్రమే వేపి తీసుకోండి. మరీ ఎర్రగా వేగితే పనీర్లోకి ఫ్లేవర్స్ ఇంకవు.
ఏ కారణం చేతనైన పనీర్ ఎక్కువగా వేగిపోతే వెంటనే ఉప్పేసిన నీళ్లలో పనీర్ ముక్కలు వేసి వదిలేయండి గట్టి పడిన పనీర్ కాస్త మెత్తబడుతుంది. గ్రేవీ తయారయ్యాక పనీర్ని నెమ్మదిగా పిండి కూరలో వేస్తే మసాలాలని పీలుస్తుంది.

గ్రేవీ:

గసగసాలు:

తెలుగు వారి పనీర్ బటర్ మసాలా అంటే కచ్చితంగా జీడిపప్పుతో పాటు గసగసాలు, ఎండు కొబ్బరి ఉండాల్సిందే!!! గసగసాలు లేని వారు జీడిపప్పు ఇంకొంచెం పెంచుకోండి.

**గ్రేవీ గ్రైండింగ్:**

గ్రేవీ నీళ్లతో వెన్న అంత మెత్తగా గ్రైండ్ చేసుకోవాలి. అప్పుడే బటర్లా ఉంటుంది గ్రేవీ. ఒక వేళా గ్రేవీ బరకగా అనిపిస్తే టీ జల్లెడలో వేసి వడకట్టి గ్రేవీ తీసుకోండి.

బటర్:

ఉంటె బటర్ లేదా నెయ్యి అయినా వేసుకోవచ్చు. ఏది ఏమైనా ఆఖరున కసూరి మేథీ మాత్రం నలిపి వేసి తీరాలి.

ఇంకొన్ని:

నేను పూర్తిగా కేటరింగ్ వారి తీరులో చేయడం లేదు. అంటే టమాటో సాసలాంటివి ఏవీ వేయడం లేదు. నచ్చితే మీరు కొద్దిగా వేసుకోవచ్చు. కర్రీ టమాటో సాస్ వేస్తే ఒక రుచి వేయకపోతే మరో రుచి.
పెళ్లిళ్ల భోజనాలంటేనే స్పెషల్, అందుకే కొద్దిగా రంగు వేస్తారు, నేనూ వేశాను. కూరలో కచ్చితంగా వేసి తీరాలని లేదు. మీకు కూరకి మాంచి రంగు రావాలంటే ఎర్రని బాగా పండిన టమాటోలు వాడుకోండి.