పాలక్ గార్లిక్ మష్రూమ్

Curries

పాలకూర వెల్లులి గుభాళింపుతో ఎంతో రుచిగా ఉండే స్పెషల్ రెసిపీ పాలక్ గార్లిక్ మష్రూంస్. చూడానికి పాలక్ పనీర్కి చిన్న మార్పులా అనిపిస్తుంది కానీ రుచి పూర్తిగా భిన్నంగా ఉంటుంది. రోటీ నాన్తో చాలా రుచిగా ఉంటుంది పాలక్ గార్లిక్ మష్రూమ్ కర్రీ.

పాలకూర తో ఎంతో ఫేమస్ అందరికీ నచ్చిన రెసిపీ అంటే అది పాలక పనీరే, ఈ పాలక్ గార్లిక్ మష్రూమ్ కర్రీ కూడా అంతే రుచితో ఉంటుంది.

నేను మొదటిసారి పాలక్ మష్రూమ్ కర్రీ హైవే మీద ఒక పంజాబీ ధాబాలో తిన్నాను, ఆ రోజు ఈ కర్రీతో పాటు దాల్ తడకా ప్లేట్లో సర్వ చేసుకుని నాన్తో తింటూనప్పుడు తడకాలో వెల్లులి పాలక్ కర్రీలోకి చేరి చాలా రుచిగా అనిపించింది. అప్పుడు పాలక్లో మష్రూమ్స్తో పాటు వెల్లులి ఫ్లేవర్తో కలిపి చేస్తే ఎలా ఉంటుంది అనే ఐడియాతో చేసిన రెసిపీ ఇది.

రెసిపీ ప్రింట్ చేయడానికి

టిప్స్

పాలకూర:

పాలకూర రంగు మారకుండా కూర ఆకు పచ్చగా ఉండాలంటే పాలకూర ఆకు మరిగే నీళ్ళలో వేసి ఒక పొంగురానిచ్చి వెంటనే తీసి చల్లని నీళ్ళలో వేస్తే ఆకు నల్లబడదు. ఇంకా ఆకు ఉడికెప్పుడు కొద్దిగా పంచదార వేస్తే కూడా ఆకు రంగు నిలిచి ఉంటుంది. మష్రూమ్స్ :
పుట్టగొడుగులు సగానికి కోసి రెండు ముక్కలు చేసుకుంటే చాలు. ఇంకా మరిగే నీళ్ళలో వేసి 2 నిమిషాలు ఉడికిస్తే సరిపోతుంది, మిగిలినది కూరలో మగ్గిపోతుంది. వెంటనే తీసి చల్లని నీళ్ళలో ఉంచితే మరీ మెత్తగా ఉడకవు.

వెల్లులి :

ఈ రెసిపీలో వెల్లులి దట్టించి వేస్తేనే పరిమళం రుచి. కానీ వెల్లులి లేత బంగారు రంగు వచ్చేదాక వేపుకుంటే సరిపోతుంది. ఎక్కువగా వేగితే చెదవుతుంది కూర.

ఉప్పు కారం మసాలాలు:

పాలకూర రెసిపీస్కి ఉప్పు తక్కువగానే పడుతుంది. కాబట్టి ఉప్పు కొద్దిగా వేసుకోండి. అవసరమైతే ఆఖరున కలుపుకోవచ్చు.

ఇంకొన్ని టిప్స్:

పాలకూర నూనె పైకి తేలేదాక నిదానంగా ఉడికితేనే రుచిగా ఉంటుంది, లేదంటే పసరు వాసనవస్తుంది.
నేను ఆఖరున ఫ్రెష్ క్రీమ్ వేశాను, నచ్చని వారు లేని వారు చిలికిన పెరుగు మష్రూమ్స్తో పాటు వేసి కలుపుకోవచ్చు.