మిర్చీ బజ్జీ | హైదరాబాద్ స్టైల్ మసాలా మిర్చీ బజ్జీ

Street Food

4.8 AVERAGE

పైన సెనగపిండి కరకరలాడుతూ, లోపలి మిర్చీ ఎర్రగా వేగి, పుల్లగా కారంగా ఘాటుగా ఉండే హైద్రాబాద్ మసాలా మిర్చీ బజ్జీ రుచి మాటలకందనిది.

సాయంత్రం అయితే చాలు హైదరాబాద్లో ఏ మూలకి చుసిన ఒక మిర్చీ బజ్జీ బండి కనిస్తుంది, అక్కడా వేపే మిర్చీ బజ్జీల సువాసన పక్క వీధులకి వారిని వేడి వేడిగా బజ్జీలు వేగుతున్నాయి రావాలి రావాలి అని గోల పెట్టి పిలుస్తుంటాయ్. సాయంత్రాలు టీ తాగుతూ వేడి వేడి మిర్చి బజ్జీ కొరుక్కుని తినడం మాటల్లో చెప్పలేని ఒక గొప్ప అనుభూతి.

నేను చెప్పిన ఈ విషయం ఒక్క హైదరాబాదుకు పరిమితం కాదు యావత్ తెలుగు రాష్ట్రాలకు సంభందించిన విషయం. కానీ హైదరాబద్లో దొరికే మిర్చీ బజ్జీకి రాజమండ్రీలో బజ్జీకి గుంటూరు వైపు ఇష్టంగా ఇష్టంగా తినే బజ్జీ రుచికి పొంతన లేదు. అన్ని చోట్లా అందరు వాడేది సెనగపిండి కానీ బజ్జీలు వేపే తీరు మిర్చీ లోపల పెట్టె మసాలా భిన్నం.

మీరు ఈ రెసిపీని కూడా ఇష్టపడవచ్చు ఉల్లిపాయ పకోడీ

చాలా మందికి మిర్చీ బజ్జీ రెసిపీ యేముఉండి తెలుసు అనే అనిపిస్తుంది, కానీ కొన్ని కచ్చితమైన టిప్స్ పాటిస్తేనే అసలైన మిర్చి బజ్జీని చేయగలుగుతారు.

రెసిపీ ప్రింట్ చేయడానికి

టిప్స్

సెనగపిండి:

సెనగపిండి మామూలుగా బూందీకి వాడే మృదువైన సెనగపిండి కాకుండా కాస్త బరకగా ఉండే సెనగపిండి వాడుకోండి
కొందరు బజ్జీ కారకరలాడడానికి బియ్యం పిండి కూడా కొద్దిగా కలుపుతారు, సెనగపిండిలో. నచ్చితే మీరు కలుపుకోవచ్చు.

నీళ్లు:

పొసే నీళ్లు చిక్కని ఇడ్లీ పిండి అంత చిక్కగా ఉండాలి. అప్పుడే మిరపకాయకి పిండి అంటుతుంది.

వంట సోడా:

వంట సోడా ¼ tsp సరిపోతుంది, అంత కంటే అవసరం లేదు.

మిర్చీ:

బజ్జీ మిరపకాయలు అని ప్రేత్యేకంగా దొరుకుతాయ్, అవి వాడితేనే బజ్జీ కారం తినేలా ఉంటుంది.
మిరపకాయ అంచుని కొద్దిగా అంటే ¼ ఇంచ్ కోసి తరువాత మధ్యకి చీరి లోపలి గింజలు దులిపేయండి. దీని వలన బజ్జే కారం తగ్గుతుంది.
మిరపకాయ చివర్న కోసిన చిన్న మిర్చీ ముక్కలు చట్నీలకి వాడుకోవచ్చు.

లోపలి స్టఫింగ్:

కచ్చితంగా చింతపండు చిక్కని గుజ్జునే వాడుకోవాలి. చింతపండు నీరుగా ఉండకూడదు. అలా నీరుగా ఉంటె నూనెలో వేగేప్పుడు నూనెలోకి నీరు దిగి నూనె అంత పాడైపోతుంది.

మిర్చీ కోసేప్పుడు చేతులు మండకూడదు అనుకుంటే:

మిర్చీని కోయడానికి ముందు చేతులకి నూనె రాసుకోండి. అప్పుడు చేతులకు మండవు.

ఆఖరుగా కొన్ని కచ్చితంగా పాటించాల్సిన టిప్స్:

పిండిలో నీరు ఉప్పు సోడా వేశాక బాగా ఎక్కువసేపు బీట్ చేసుకోవాలి. పిండి ఎంత ఎక్కువసేపు బీట్ చేస్తే అంత బాగా వస్తాయ్ బజ్జీలు
పిండి కలిపిన వెంటనే బజ్జీలు వేయాలి లేదంటే బజ్జీ ఎర్రగా వస్తుంది
బజ్జీలు వేసేప్పుడు నూనె బాగా వేడిగా ఉండాలి. మూకుడు సైజుని బట్టి 3-4 వేసుకోండి అంతేగాని ఎక్కువగా బజ్జీలని నింపకండి.